Josep Borrell, shefi i Bashkimit Evropian për Politikë të Jashtme dhe Siguri, i ka kthyer përgjigje kryeministrit të Kosovës, Albin Kurtit, për planin me 5 pika të propozuara prej tij për daljen nga kriza. Por Borrell thotë se kushtet e kërkuara nga BE-ja dhe SHBA-ja janë të qarta.
Pika parë sipas Borrell është që kryetarët e zgjedhur shqiptarë përkohësisht të punojnë në lokacione alternative.
Pika e dytë që kërkon ai është që Policia e Kosovës të ndalë aktivitetet operacionale rreth atyre komunave. Kërkohet që Njësia Speciale të tërhiqet, por Borrell thotë se do të kërkojnë nga Beogradi të largojë elementet radikale.
Pika e tretë kërkohet që sa më shpejtë të mbahen zgjedhjet lokale në 4 komunat veriore. Vetëm pasi të realizohen kushtet e Bashkimit Evropian, ai thotë se do të organizohet një takim i nivelit të lartë mes kryeministrit Kurti dhe presidentit serb, Aleksandër Vuçiç. Ai i ka kërkuar Kurtit që të ndërmerren veprime të de-përshkallëzimit të situatës në Veriun e Kosovës.
Plani pesëpikësh i Kurtit për uljen e tensioneve në veri
- Sundimi i ligjit në katër komunat në veri, që nënkupton identifikimin, ndjekjen penale dhe gjykimin e drejtë të të gjithë anëtarëve të grupeve kriminale që kanë sulmuar Policinë, trupat e NATO-s dhe gazetarët
- Grupet e dhunshme të tërhiqen menjëherë nga territori i Kosovës dhe ndalohet çdo akt kriminal kundër institucioneve të Kosovës
- Policia e Kosovës, pjesëtarë të NATO-s dhe EULEX-i të kryejnë vlerësime të përbashkëta të sigurisë, për të garantuar një ambient të sigurt dhe pa rreziqe për të gjithë.
- Qeveria e Kosovës të koordinohet me të gjithë aktorët dhe të shpallë zgjedhje të parakohshme në katër komunat në veri
- Kosova dhe Serbia t’i rikthehen dialogut të ndërmjetësuar nga Brukseli, dhe një takim i nivelit të lartë të mbahet gjatë kësaj jave
