Ka ardhur një reagim i shkurtër i KFOR për rrëmbimin e 3 policëve nga forcat serbe. Në reagim thuhet se KFOR është në kontakt me autoritetet e Serbisë për të marrë informacione se çfarë ka ndodhu. Në një komunikim për media, KFOR-i ka thënë se nuk është përfshirë në ngjarjen e sotme.
“KFOR nuk ka qenë i përfshirë në ngjarjen e sotme sa i përket tre pjesëtarëve të Policisë së Kosovës dhe aktualisht është në kontakt me autoritetet serbe për të marrë informacion zyrtar mbi atë çfarë ka ndodhur” - thuhet në reagim.
Më herët ministri i Punëve të Brendshme, Xhelal Sveçla, deklaroi se policët e rrëmbyer nga Serbia nuk dihet ku po mbahen dhe janë të arrestuar nga institucionet serbe. Ai vizitoi vendin ku policët u rrëmbyen në Leposavic. Sipas ministrit Sveçla, Serbia duhet t’i kthejë sa më shpejt zyrtarët policorë, së bashku me pajisjet e tyre private dhe zyrtare.
Ndërsa Bashkimi Evropian ka thënë se është në kontakt me Kosovën dhe Serbinë, e gjithashtu edhe me KFOR-in për të kuptuar më shumë rreth asaj se çfarë ka ndodhur të mërkurën në veri, ku janë kidnapuar tre zyrtarë policorë të Kosovës nga forcat serbe. Zëdhënësi i BE-së, Peter Stano, ka thënë se Kosova dhe Serbia duhet të përmbahen nga veprimet që e tensionojnë edhe më shumë situatën në veri.
“Ne jemi – si çështje urgjente – në kontakt me të dyja palët, si dhe me KFOR-in, për të përcaktuar se çfarë dhe si ka ndodhur saktësisht. I bëjmë thirrje Kosovës dhe Serbisë që të përmbahen nga çdo veprim apo reagim që mund të kontribuojë më tej në ngritjen e tensioneve. Ne përsërisim thirrjen e BE-së për de-përshkallëzimin e menjëhershëm”, ka thënë ai. ©LAPSI.al
