Ditën e sotme është ekstraduar nga Greqia Jorgo alias Olsi Leku, i akuzuar për vrasjen e babë e bir në Elbasan, Gentian dhe Nezir Beqiri, dhe i dënuar me burg përjetë. Gjykata e Posaçme ka dënuar me burgim të përjetshëm edhe Ardjan Çapja, Florenc Çapjan.
Vrasja e dyfishtë e babë e bir, Gentian dhe Nezir Beqiri ndodhi më 15 gusht të vitit 2012. Gentian Beqiri i njohur dhe si Ardian Meta ndodhej në “Arrest shtëpie”, i akuzuar për vrasjen e biznesmenit Sokol Çapja, në dhjetor 2005. Gentian Beqiri së bashku më babanë e tij u vranë në ambientet e brendshme të shtëpisë së tyre në Elbasan.
Ndaj Gentianit, i cili ishte dhe i paralizuar, është qëlluar nga një pistoletë me silenciator me 7 plumba. Ndërsa më pas është vrarë dhe babai i Gentianit, Neziri.
Ditën kur ndodhi ngjarja shtëpia e viktimave ruhej nga dy policë, të cilët më pas u akuzuan për “Shpërdorim detyre”.
