Kryeministri britanik Rishi Sunak po planifikon një marrëveshje me Italinë për të zvogëluar numrin e emigrantëve që kalojnë Mesdheun dhe për t’i kthyer ata në Afrikën veriore.
Sunak dërgoi sekretarin e kabinetit dhe kreun e shërbimit civil Simon Case në mes të qershorit në Itali për takime me zyrtarë të lartë të qeverisë italiane për të punuar për një marrëveshje. Një burim qeveritar i njohur me këtë çështje konfirmoi se Case ishte në Itali, pa dhënë detaje të mëtejshme.
“Për të trajtuar me sukses emigracionin e paligjshëm, ne duhet ta trajtojmë këtë çështje në burim, si dhe të fokusohemi në varkat e vogla”, tha një burim qeveritar, sipas Telegraph.
Mbretëria e Bashkuar dhe Italia nënshkruan një Memorandum Mirëkuptimi në prill për të trajtuar imigracionin e paligjshëm si pjesë e “Partneritetit Strategjik për Migracionin”.
“Ne jemi duke punuar ngushtë me Italinë dhe partnerë të tjerë europianë për të ndaluar imigracionin e paligjshëm dhe për të trajtuar bandat e kontrabandistëve të njerëzve që veprojnë përtej kufijve. Kjo është një sfidë që ne ndajmë” tha një zëdhënës i qeverisë së Mbretërisë së Bashkuar.
Një rekord prej 45,000 njerëzve mbërritën në Britani vitin e kaluar, kryesisht nga Franca, sipas shifrave të qeverisë. Më shumë se 11,000 kanë mbërritur deri më tani këtë vit, sipas qeverisë.
