Presidentja e Kosovës Vjosa Osmani konfirmoi mbrëmjen e kësaj të mërkure se do presë në takim kryeministrin Edi Rama nesër në Prishtinë. Lajmi është konfirmuar nga zyra e shtypit e presidencës së Kosovës.
“Në orën 16:00, Presidentja e Republikës së Kosovës, Vjosa Osmani pret në takim kryeministrin e Republikës së Shqipërisë, Edi Rama. Mediat mund të marrin pamje në fillim të takimit”, - thuhet në një njoftim të zyrës së shtypit të Osmanit. Në Prishtinë Rama do të takojë edhe kryetarin e Kuvendit, Glauk Konjufca.
Më herët kryeministri i Kosovës, Albin Kurti u shpreh se nuk ka arsye të takojë kryeministrin Edi Rama gjatë vizitës së këtij nëse nuk mbahet mbledhja e dy qeverive. Ai ftoi Ramën që gjatë vizitës dy ditore në Prishtinë më 6-7 korrik, të vijohet me mbledhjen e dy qeverive që u anulua në Gjakovë.
“Unë miqësisht i kam kërkuar kryeministrit Rama që ta mbajmë edhe mbledhjen e dy qeverive, e cila u anulua paarsyeshëm. Në mënyrë që këto marrëveshjet e dakorduara të mos mbeten në sirtar unë i kam propozuar kryeministrit Rama që meqë po vjen dy ditë në Prishtinë ta mbajmë edhe një mbledhje të përbashkët të dy qeverive. Për takime personale ne të dy kemi kontakt të drejtpërdrejtë. Unë jam i gatshëm të takohem me kryeministrin Rama në kuadër të mbledhjes së dy qeverive, jo në takime të tjera” – tha Kurti.
Ndërsa Rama gjatë një deklarate për mediat pasi përfundoi mbledhja e qeverisë, nuk pranoi të komentonte refuzimin nga ana e kryeministrit të Kosovës, duke theksuar se “do të flasë për këtë çështje kur të jetë koha për të folur”, por tha se do të vizitojë nesër Prishtinën. /LAPSI.al
LEXO EDHE: Kronologjia/ Pse po ia mbyllin derën Ramës në Prishtinë
