Këshilli i Mandateve është mbledhur sërish sot për të shqyrtuar kërkesën e prokurorisë për arrestimin e Arben Ahmetajt. Mbledhja u shty një ditë më parë pas kërkesës së avokatëve të Ahmetajt, të cilët kërkuan më shumë kohë për të shqyrtuar dosjen prej 400 faqesh.
Ish-zv.kryeministri Arben Ahmetaj është larguar nga Shqipëria para se Kuvendi të shqyrtojë kërkesën e SPAK për arrestimin e tij. Sipas Zërit të Amerikës, nga verifikimet e sinjalit të celularit të Ahmetajt, rezulton se momenti i fundit i vendndodhjes të ketë qenë Kanadaja. Dyshohet se Ahmetaj është larguar nga kufiri tokësor i vendit, drejt Greqisë pak orë përpara se sa Prokuroria t’i dërgonte parlamentit shkresën për arrestimin. Zëri i Amerikës shkruan se më pas Ahmetaj kishte prerë online një biletë avioni për në Itali, por që nuk e ka përdorur.
