Ndërsa pritet që Edi Rama të vendoasë për arrestimin apo jo të Arben Ahmetajt, ky i fundit nuk ka qëndruar duarkryq por është larguar jashtë. Para tij, e kishte bërë gabimin që t'i dorëzohej burgut Lefter Koka. Ai hoqi dorë vetë nga mandati i deputetit dhe shkoi në burg, ku ende pret vendimin e gjykatës. Alqi Bllako ishte më i dyzuar. Ai u zhduk rreth 12 orë para arrestimit, megjithëse e dorëzoi mandatin dhe respektoi urdhrin e partisë. U spekulua atëherë se Bllako negocoi një marrëveshje për burgosjen e përkohshme dhe shkoi në polici rreth orës 05:00 të mëngjesit, ku iu vunë prangat.
Që Ahmetaj ka zgjedhur të luajë më fort se Koka dhe Bllako, u kuptua kur i kërkoi pubikisht Edi Ramës të mos bëhet gjykatës, por të vazhdojë të bëjë kryeministrin. Edhe ky i fundit nuk e la pa përgjigje dhe iu kthye me fjalët se “po ta bënte ai gjykatësin, do të ishte më keq”.
Pas këtij komunikimi në publik, Ramës i duhet të marrë vendim për arrestimin apo jo të Ahmetajt. Në atë që pritet të ndodhë pas pak orësh ka disa skenarë.
Nëse Rama vendos që ish-zv/kryeministri të mos arrestohet, nuk përjashtohet mundësia që Ahmetaj të kthehet nga Kanadaja sikur asgjë të mos kishte ndodhur. Të qënit deputet i jep atij kohë të përballet me prokurorët në sallën e gjyqit, ndërsa qëndron i lirë. Ky është pak a shumë rasti i Tahirit, që e ndoqi seancën në liri dhe u dënua me burg më vonë.
Skenari tjetër është që Rama ia heq mandatin dhe i hap rrugë arrestimit. Këtu duhet të bëjë llogaritë me reagimin e Ametajt, që e ka prishur traditën e atyre që i dorëzohen prangave me mendësinë se “partia ime më arreston”.
Lexo edhe: Dokumenti i arrestit/ Pse akuza e SPAK fajëson Ramën (VIDEO)
Lexo edhe: Zhduket Arben Ahmetaj/ A u arratis me leje ish-zëvëndësi i Ramës?
Një ditë më parë, ish-ministri i drejtësisë Ylli Manjani, shprehej se kërkesa e SPAK për një seancë të mbyllur për Ahmetajn ishte në fakt, një ftesë për t’ia mbyllur gojën. Sepse Ahmetaj ka shumë për të thënë.
“Arben Ahmetaj është dëshmitar i çdo qindarke transaksion që ka ndodhur në këtë vend. Nuk janë vetëm inceneratorët që kanë ndodhur këtu, por ka plot e plot, miliarda të shpërndara e rishpërndara sipas një axhende të kontrolluar nga lart. Beni është dëshmitari kyç i kësaj veprimtarie ekzekutive, politike e kriminale” shkruante Manjani.
Në gjithë këtë situatë të denjë për filmat me gangsterë, nuk duhet harruar as lëvizja që bënë tre ish-miqtë e Arben Ahmetajt dhe që është një skenar po aq i mundshëm për të ndodhur. Mirel Mërtiri, Klodian Zoto dhe Stela Gugallja u arratisën në Vjenë dhe nuk u hyri gjemb në këmbë, megjithëse nuk ishin deputetë.
Edhe arratisja e tyre ishte "me leje". Policia i shpalli në kërkim ndërkombëtar një muaj pasi i kërkoi SPAK. Ishte e qartë se ata ishin larguar nga vendi ndërsa prokurorët prisnin arrestimin. Të tre vazhdojnë të marrin miliona nga inceneratorët, në respekt të kontratës që ua serviri qeveria Rama. Ky variant i shkon për shtat më së miri të gjithë protagonistëve dhe mund të krahasohet me kodin e heshtjes, "omerta" që ka funksionuar prej shekujsh në mafian italiane./Lapsi.al
