Sali Berisha ka nxjerrë fakte të reja nga dosja e SPAK për inceneratorin e Tiranës. Berisha tha se me procedurat e inceneratorit është përfshirë edhe "Studio e Velicës! E bashkëshortes së Erion Veliajt". Bëhet fjalë për studion e Floran Pustinës, emailet e të cilit kalojnë deri tek Klodian Zoto sipas dosjes së SPAK.
"A e dini kush e ka bërë projektin e djegësit të Tiranës? Kush ka qenë konsulente? Studio e Velicës! E bashkëshortes së Erion Veliajt. Studio aktive dhe superaktive në këtë problem. Ku është? Pse Erion Veliaj është anëtar kryesor i klanit të plehrave? Së pari, Erion Veliaj është nismëtari, që e kaloi nga prokurim publik, në koncesion. E nuhati se fitohej më shumë dhe se mund t’ia linte edhe djalit. Ia kalon për koncesion ministrit Shkëlqim Cani, ai e kundërshton. Ia dërgon Arben Ahmetajt, ai e refuzon. Ia dërgon letrën e dytë dhe më pas të tretën, dhe Ahmetaj shkruan: No koment, meqenëse kjo është kompetencë e qeverisë vendore. Ahmetaj është në tavë me këtë. Erion Veliaj që kërcënoi një gazetare që publikoi një fragment të dosjes. Erion Veliaj, me Edi Ramën dhe Engjëll Agaçin është kupola e djegësit të Tiranës"
Floran Pustina njihet si mik i ngushtë i Arbjan Maznikut, nënkryetar i Bashkisë Tiranë. Ajola Xoxe, bashkëshortja e Erion Veliaj ka punuar dikur (2013) tek studio ligjore “Tashko & Pustina”.
Sipas dosjes së SPAK, Floran Pustina dhe Flonja Tashko të studios ligjore “Tashko & Pustina”, kane përpunuar bashkë me Klodian Zoton dhe Alba Thomën vendimin e Këshillit Bashkiak për inceneratorin e Tiranës.
