Përfaqësuesit e Listës Serbe – partia më e madhe e serbëve të Kosovës – përkatësisht nënkryetari i kësaj partie, Igor Simiç dhe anëtari i kryesisë, Slavko Simiç, gjatë vizitës së tyre në Shtetet e Bashkuara të Amerikës, këtë të enjte janë takuar me të Emisarin Special të SHBA-së për Ballkanin Perëndimor, Gabriel Escobar.
Në këtë takim është diskutuar qëndrimi i komunitetit serb për situatën e sigurisë dhe atë politike në Kosovë, transmeton media në gjuhën serbe në Kosovë “KosovoOnline”.
Po ashtu, përfaqësuesit e Listës Serbe me Escobar-in kanë biseduar edhe për nevojën e respektimit të marrëveshjeve të nënshkruara, përfshirë marrëveshjet për formimin e Asociacionit të Komunave me Shumicë Serbe, si dhe udhërrëfyesi për de-eskalimin e situatës në Veri të Kosovës.
Ndryshe, kjo vizitë e përfaqësuesve të Listës Serbe në Shtetet e Bashkuara të Amerikës vjen pas tensioneve që janë krijuar në Veri të Kosovës, që nga 26 maji.
Tensionet ishin krijuar pas vendimit të qeverisë së Kosovës për t’i instaluar në zyrat e tyre kryetarët e komunave Veriore – Leposaviq, Zveçan dhe Zubin Potok – në zyrat e tyre, çka kishte shkaktuar reagim të ashpër të serbëve lokalë të cilët janë shumicë në atë pjesë.
Situatë më e tensionuar ishte të hënën e 29 majit kur protestuesit e dhunshëm serbë sulmuan ushtarët e misionit të NATO-s në Kosovë, KFOR, ku mbetën të lënduar dhjetëra prej tyre, kryesisht italianë dhe hungarezë.
Situata agravoi edhe më tej kur me 14 qershor xhandarmëria serbe kidnapoi 3 policë të Kosovës në pikën kufitare, të cilët u liruan vetëm pas presionit të madh të bashkësisë ndërkombëtare.
Ndërkombëtarët ishin mjaft të ashpër ndaj Kosovës, pasi që bënë përgjegjës atë për situatën e krijuar.
Si pasojë ata vendosen edhe masa ndëshkuese ndaj Prishtinës për të cilat kanë thënë se do të hiqen vetëm pasi që Kosova ta pranojë planin për de-eskalimin e situatës – i prezantuar tash e një kohë nga Bashkimi Evropian dhe i mbështetur nga SHBA-të.
Pas këtyre masave ndëshkuese Kosova pranoi një pjesë të planit të de-eskalimit, ndër të cilat tërheqja për 25 për qind e njësive policore nga objektet komunale të komunave në Veri, si dhe mbajtja e zgjedhjeve të reja atje.
Mirëpo, përkundër këtyre hapave për de-eskalim të ndërmarrë nga Kosova, masat ndëshkuese ende nuk janë larguar, pasi që po kërkohen veprime shtesë nga Prishtina.
