Me zellin e një ministri të ri që kërkon të tregojë veten përballë atij që e gradoi në këtë post, Taulant Balla ka nisur prej disa ditësh turin e takimeve me strukturat e Policisë së Shtetit. Është vënë në krye të një përpjekje për t’i trimëruar përballë krimit ndërkohë që krah tij është Muhamet Rrumbullaku për të cilin 10 vite më parë Taulant Balla kishte plot akuza e aspak konsiderata.
Ende sot në faqen në Facebook të Taulant Ballës gjen një deklaratë të tij për të ashtuquajturin Grupi Çiftelia. Ai kërkonte urgjentisht lirimin nga detyra të “katër barkderrave drejtues të lartë të Policisë së Shtetit”. Mes tyre ishte edhe Muhamet Rrumbullaku, sot kreu i Policisë së Shtetit, Tonin Vocaj, sot kreu i policisë së Tiranës.
“Në kete tavolinë u vendos kryqëzimi i kryekomisar Dritan Lamajt. Katër drejtuesit më të lartë të policisë së shtetit, barkderra dhe me raki përpara, hanë dhe këndojnë së bashku me një person që akuzohet për vrasjen e një kryekomisari. Me çifteli në dorë, kupola gezon ne prani te te akuzuarit”, shkruante një dekadë më parë Taulant Balla.
Sot ai është Ministër i Brendshëm dhe shëtit me Muhamet Rrumbullakun për të dhënë leksione se si forcohet Policia e Shtetit e si luftohet krimi që ka marrë yrrysh. Kujt Taulant Balle duhet t’i besojmë, këtij të sotmit me kostumin e ministrit apo atij të 10 viteve më parë që fliste për tradhti të Policisë së Shtetit dhe kryepolicin e sotëm e quante barkderr me raki përpara në tavolinë me krimin? Të kërkosh koherencë qëndrimesh në politikën shqiptare është mision thuajse i pamundur, aq më tepër te politikanë të sojit të Taulant Ballës.
Nuk ka ndonjë pritshmëri të lartë publike, madje as vetë brenda radhëve të socialistëve për suksesin e Taulant Ballës në krye të Ministrisë së Brendshme, por çfarë pritet me kërshëri është nëse ai do të arrijë të largojë apo jo Muhamet Rrumbullakun, kryepolicin që 10 vite më parë e cilësonte si “barkderr” e të lidhur me krimin e të dehur me raki. ©LAPSI.al
