Anëtarja e KLP-së, Nurihan Meta nuk do të japë dorëheqjen për t'i hapur rrugë një hetimi të pandikuar dhe të paanshëm nga prokurorët e Vlorës për vrasjen që kreu i biri, Rei Meta. 24 orë pas ngjarjes nuk ka asnjë reagim as nga institucioni ku supozohet se punojnë juristë me integritet të lartë moral.
Duke qenë pjesë e Këshillit të Lartë të Prokurorisë, Nurihan Meta është pjesë e vendimmarrjes për emërimin, promovimin apo masat e ndëshkimit të prokurorëve në të gjithë vendin dhe në këto kushte mund të ndikojë në hetimin e të birit që punonte doganier, por bënte edhe sekserin e pronave në Vlorë.
Në anën tjetër një investigim i News24 mbi familjen Meta tregon se të gjithë antarët e familjes ishin të punësuar në shtet, në poste të rëndësishme të administratës.
Neës24 zbuloi se Rei Meta, i arrestuar për vrasjen ndërtuesit në Vlorë, është Përgjegjës Grupi i Inspektorëve të Kontrollit Fizik në Drejtorinë e Përgjithshme të Doganave.
Ai kishte 4-5 vite që bënte rolin sekserit të ndërtuesve, të njerëzve që kishin halle në zyrat e shtetit dhe bënte ndërhyrje në organet e drejtësisë në Vlorë, Sarandë, Durrës e Tiranë, ku përdorte për lehtësi ndikimin e së ëmës anëtare e Këshillit të Lartë të Prokurorisë.
Pra, djali i drejtueses së lartë të qeverisë së prokurorëve, ka përdorur pushtetin e së ëmës për të ndikuar në akte zyrtare, kundrejt përfitimeve të paligjshme financiare e pasurore.
Por jo vetëm kaq. Rei Meta kishte edhe ndihmën e babait. Bashkëshorti i anëtares së KLP, Hazis Meta, me profesion oficer kufiri është Shef Sektori Juridik në Kadastrën e Përgjithshme, i emëruar pas zgjedhjes së gruas së tij në Këshillin e Lartë të Prokurorisë.
Vajza e tyre Santeliana Meta, deri në momentin kur e ëma u emërua anëtare e Këshillit të Lartë të Prokurorisë, punonte në Ministrinë e Brendshme së bashku me xhaxhanë e saj, ndërsa nga 1 janari 2020 e në vazhdim është Shefe Sektori në Prokurorinë e Tiranës.
