"Mba do të jetë mungesa jonë e nesërme, por duhet të përgatitemi për të tilla problemesh pasi në futboll ndodhin këto gjëra. Sipas informacioneve që kam, Mba do të qëndrojë të paktën për 10 ditë jashtë fushave. Por e rëndësishme është që nuk ka një dëmtim serioz". Zoran Zekic 'qan' mungesën e qendërsulmuesit të tij, para ndeshjes së kthimit për raundin e tretë të Conference League kundër Valmiera. Kroati, megjithatë, nuk gjen siguri në 1-2 e ndeshjes së parë. "Iu kam kërkuar lojtarëve që të besojnë shumë në vlerat e tyre. Ai që kanë arritur në ndeshjen e parë, është një rezultat pozitiv, por nuk duhet të flemë 'gjumë'. Duhet të tregohemi shumë të zgjuar dhe ta interpretojmë ndeshjen ashtu siç i kam dhënë udhëzimet. Edhe pse ndonjëherë nuk më ndjekin si duhet. Por unë kërkoj që gjithmonë të zbatojnë gjërat që unë jap".
STRATEGJIA E KROATIT
Zekic, një njeri i eksperiencës në të tilla ndeshje, e di shumë mirë cfarë pret nga skuadra e tij, në ndeshjen në Elbasan Arena: "Duhet të largojmë presionin, lojtarët duhet të luajnë dhe të japin maksimumin. Valmeira është një kundërshtar që duhet respektuar. Duhet të mendojmë vetëm për kundërshtarin që kemi përballë. Nuk mendoj aspak për atë që na pret në turin tjetër nëse kualifikohemi. Dua përqëndrim dhe vlerësim maksimal për nesër".
Lexo më tej: Me sulm të 'shpartalluar' e dilema për të zgjidhur: Partizani sheh playoff-in ndaj Valmieras
ÇËSHTJE MATEMATIKE
Partizani duhet të bëjë gjithashtu edhe pa brazilianin Da Silva dhe Atanaskoskin, por kjo nuk i shërben si alibi Zekic: "Jam si natyrë që nuk kënaqem lehtë. Kështu punojmë shumë edhe përsa i përket analizave me skuadrën. Por është e vërtetë që skuadra ime ka zhvilluar një pjesë të dytë shumë të mirë në Letoni. Kam qenë shumë i mirë në shkollë, por në matematikë kam qenë disi problematik. Kështu nuk mund të jap shanset dhe do tja lemë fushës nesër”, e mbylli tekniku i të kuqve.
