Autoritetet italiane kanë dhënë sot lejen për t’i kthyer familjes trupin e 23-vjeçarit shqiptar Klajdi Bitri të vrarë me shtizë nga një algjerian të dielën e kaluar në Sirolo të Ankonës. Që në mëngjes në morgun e Torrette është hapur një zyrë funerali ku ndodhen miqtë e 23-vjeçarit dhe vëllait të tij, 18-vjeçar.
“Do të qëndrojmë këtu derisa të nisej arkivoli” – thotë Kledian Kasa, një nga miqtë duke shtuar: “Ndoshta do të shkojë nesër, me anijen që niset nga porti i Ankonës”. Miqtë dhe vëllai i të riut do ta shoqërojnë trupin. Vendlindja e Klajdit në Lushnjë ka dërguar një autoveturë funerali për transportin me anije. Gjithashtu ka nisur një grumbullim fondesh për të ndihmuar familjen transportuar në Shqipëri trupin e viktimës.
Vrasësi del para gjyqit
Fatah Melloul, 27-vjeçari algjerian i akuzuar për “vrasjen me dashje” të Bitrit, duhet të qëndrojë në burgun e Montacuto. Gjyqtarja e Ankonës, Sonia Piermartini, para së cilës i riu doli për seancën e masës së sigurisë, ka konfirmuar ndalimin dhe ka vendosur masën e “arrestit në burg”. Gjatë seancës, por edhe marrjes në pyetje ai shfrytëzoi të drejtën për të qëndruar në heshtje.
Në ndihmë të tij ishte avokatja Sabrina Stefanelli, e cila nuk ka dashur të japë një version për ngjarjen e ndodhur. Siç dihet nga dëshmitë e njerëzve të pranishëm shkak për konfliktin u bë një mosmarrëveshje në trafik. Algjeriani është ankuar pse makina përpara tij ku udhëtonte një italian, mik i viktimës po lëvizte ngadalë.
Klajdi ka ndërhyrë për të shuar sherrin, por algjeriani ka marrë një pushkë peshkimi (fuzhnje) dhe e ka qëlluar 23-vjeçarin shqiptar i cili vdiq në vend. Sipas autopsisë, shtiza i kishte prekur zemrën dhe një pjesë të mushkërisë. Më pas algjeriani u largua me makinë me të dashurën e tij. Karabinierët e kishin mbajtur nën përgjim dhe 4 orë më vonë e prangosën duke u kthyer nga deti ku kishte shkuar për peshkim me të njëjtën shtizë.
Italianët, homazh për shqiptarin
Një tubim homazh për të kujtuar të riun shqiptar do të zhvillohet pasditen e së enjtes në Ankona. Tubimi do të zhvillohet në heshtje "pa tabela, parulla dhe pa slogane", nënvizojnë organizatorët, miq të viktimës. Aktiviteti "ka qëllimin e vetëm të mbështesë familjen e djalit. Nuk do të lejohet protesta, brohoritjet dhe çdo gjest që përcjell dhunë verbale apo fizike” – thuhet në njoftim. Organizatorët kanë kërkuar një autorizim nga Shtabi i Policisë së Ankonës "e cila ka dhënë lejen dhe ka ofruar mbështetje". ©LAPSI.al
