Një episod i ri dhune implikon policinë amerikane. Një 21-vjeçare shtatzënë afro-amerikane e quajtur Ta'Kiya Young, nga Columbus në Ohio u qëllua për vdekje nga oficerët. Ngjarja ndodhi më 24 gusht jashtë një dyqani ushqimor në Blendon Township. Me të vdiq edhe foshnja që ajo mbante.
Autoritetet vendase kanë publikuar videon e realizuar nga kamera e trupit e agjentëve, e cila tregon momentet e fundit të jetës së 21-vjeçares. Në video duket fillimisht një polic që i afrohet makinës duke i kërkuar asaj të dilte jashtë. 21-vjeçarja drejton makinën drejt një oficeri, i cili fillimisht i bërtet të ndalojë dhe më pas e qëllon. Gruaja u vra nga një plumb i vetëm.
“Ajo ishte shtatzënë dhe nënë e dy fëmijëve të tjerë, e paarmatosur. Kjo është përtej të pajustifikueshmes”, - tha avokati i familjes, Sean Walton. "Videoja konfirmoi frikën e tyre se Ta'Kiya ishte vrarë në mënyrë të pajustifikueshme. Ishte zemërthyese të shohësh se si i morën jetën asaj në rrethana kaq qesharake" – shtoi ai.
Duket se 21-vjeçarja kishte vjedhur një shishe me alkool nga dyqani (gjë që mohohet nga avokati) dhe kur agjentët i kërkuan të dilte nga makina, ajo futi marshin dhe tentoi të largohej. Pasi ndodhi e shtëna e armës, oficerët thyen dritaren, nxorën gruan jashtë dhe filluan t’i jepnin ndihmë me një mjek të urgjencës që ndodhej në vendin e aksidentit, por as nëna dhe as vajza nuk mbijetuan. Familja e saj e denoncoi ngjarjen si “shpërdorim të rëndë të pushtetit dhe autoritetit”.
“Ajo kishte dy djem, por ishte shumë e emocionuar që do të kishte edhe një vajzë të vogël. Ajo do t'u mungojë shumë" - tha gjyshja e Nadine Young për mediat amerikane, duke e përshkruar atë si një motër më të madhe dhe një nënë të dashur. “E gjithë kjo është thjesht tragjike. Nuk duhet të kishte ndodhur kurrë”, - tha ajo.
Një zëdhënës i sindikatës së policisë tha se deklaratat për të akuzuar oficerin përpara përfundimit të hetimit ishin të parakohshme. Ndërsa shefi i policisë së qytetit të Blendon, John Belford i quajti të shtënat “një tragjedi”. Vdekja e Young pason një varg të shtënash vdekjeprurëse nga policia ndaj afrikano-amerikanëve në Ohio dhe në mbarë SHBA-në vitet e fundit, ngjarje që kanë shkaktuar protesta të gjera dhe thirrje për reformë në polici. ©LAPSI.al
