Rustem Umerov u emërua këtë të mërkurë zyrtarisht ministër i ri i Mbrojtjes së Ukrainës nga parlamenti i vendit.
Ai u zotua se do të bëjë “çdo gjë të mundshme dhe të pamundur për fitoren e Ukrainës”.
Në një postim në rrjete sociale pasi mori detyrën e re, ai premtoi se do të rimarrë “çdo centimetër të Ukrainës”.
Emërimi i 41-vjeçarit shënon një ndryshim të rëndësishëm për Ukrainën më shumë se një vit e gjysmë pas pushtimit të Rusisë dhe pas skandaleve të korrupsionit në ministrinë e mbrojtjes.
Dje, parlamenti votoi për të pranuar dorëheqjen e Oleksiy Reznikov nga posti i tij si kreu i Ministrisë së Mbrojtjes.
Gjithashtu miratoi largimin e Umerov si kreu i Fondit të Pronës Shtetërore, duke pasuar emërimin në postin e ri. Me fillimin e pushtimit rus, Umerov iu bashkua delegacionit ukrainas në negociatat me Rusinë. Ai ishte i përfshirë edhe në procesin e negociatave për shkëmbimin e të burgosurve.
Në veçanti, Umerov kontribuoi në shkëmbimin e të burgosurve në shtator 2022, kur Ukraina arriti të kthejë 215 qytetarë, përfshirë mbrojtësit e komandantëve të Mariupol dhe Azov.
