Michael Jordan u bë atleti i parë profesionist që hyri në listën e 400 amerikanëve më të pasur të Forbes pasi pasuria e tij neto u rrit në 3 miliardë dollarë.
60-vjeçari hyri në listën vjetore për herë të parë më 3 tetor, duke u renditur në vendin e 379. Ai ndan vendin me 15 persona të tjerë, duke përfshirë producentin Haim Saban-bashkë-krijues i ekskluzivitetit të Power Rangers. Për sa u përket të tjerëve në listë, në krye është CEO i Tesla-s, Elon Musk me një vlerë neto prej 251 miliardë dollarësh, ndërsa themeluesi i Amazon, Jeff Bezos është në vendin e dytë me 161 miliardë dollarë.
Gjatë gjithë karrierës së tij si lojtari më i madh i NBA-së i të gjitha kohërave, Jordan fitoi gjashtë tituj kampion me Chicago Bulls dhe fitoi një pagë prej 90 milionë dollarësh, raportoi Forbes.
Në vitin 2003, Jordan u tërhoq nga NBA për herë të tretë dhe pasi luajti në ligë për 15 sezone."Kam dhënë gjithçka që munda për lojën," tha ai për Chicago Tribune. "Është koha. E di. E ndjej."
Jordan ka dhuruar një pjesë të pasurisë së tij për kauza bamirësie dhe politike. Në vitin 2020, ai dhuroi 100 milionë dollarë në mbështetje të lëvizjes Black Lives Matter. Shkurtin e kaluar, në ditëlindjen e tij të 60-të, ai dhuroi 10 milionë dollarë për Fondacionin Make-A-Wish në atë që shënoi kontributin më të madh individual në historinë e bamirësisë./Lapsi.al
