Britania e Madhe do t’i dërgojë dy anije të marinës mbretërore dhe avionë vëzhgimi në Mesdheun lindor në planin për ta “forcuar sigurinë”, gjashtë ditë pas nisjes së luftimeve në Lindjen e Mesme, që nga sulmi i papritur ndaj Izraelit nga Hamasi.
Avionët do të fillojnë patrullimet të premten për të “gjurmuar kërcënimet ndaj stabilitetit rajonal, siç është transferimi i armëve për grupet terroriste”.
Gjithashtu do të dërgohen tre helikopterë Merlin dhe forca për operacione speciale e Mbretërisë së Bashkuar.
Qeveria britanike po organizon gjithashtu fluturime për shtetasit britanikë të bllokuar në Izrael. Avioni i parë pritej të nisej nga Tel Avivi të enjten, por që nga mëngjesi i së premtes ai ende nuk ishte nisur.
Duke folur në Suedi të premten, kryeministri Rishi Sunak ka thënë se Mbretëria e Bashkuar po monitoronte nga afër situatën në Izrael, duke shtuar se janë të shqetësuar për civilët dhe çështjet humanitare.
Kryeministri ka thënë po ashtu se asetet e Marinës Mbretërore do të zhvendosen në Mesdhe gjatë javës së ardhshme, në mënyrë që të “sigurojnë mbështetje humanitare sipas nevojës”.
Të enjten, ai ka folur me kryeministrin e Izraelit për të riafirmuar mbështetjen e Mbretërisë së Bashkuar për Izraelin pas sulmit të Hamasit.
