Ish-kryeministri Sali Berisha është ndalur në një komunikim të shkurtër për gazetarët teksa hynte në selinë blu. I pyetur nëse sot do të paraqitej në seancën në GJKKO ai tha se nuk pranon asnjë kompromis për shkeljen e ligjit.
Ai tha se do konsultohet me juristët për hapat që do të ndërmarrë.
“Siç e dini ju, jam njeriu që kam dërguar në parlament ligjin, i cili vendoste barazinë e plotë mes çdo zyrtari dhe zyrtarit në Kushtetutë. Këtë ligj e ktheu me forcën e kartonit Rama. Jam gati ta votoj nesër. Përderisa ky ligj është në kushtetutë, nuk pranoj asnjë kompromis për shkeljen e tij. Po konsultohem me juristë.
Në çdo kohë jam i gatshëm të paraqitem për t’u pyetur dhe për çdo gjë. E vetmja gjë që nuk pranoj është të shkel kushtetutën e vendit. Të ndryshojmë kushtetutën. Jam autori i ligjit që kjo mbrojtje të mos ekzistojë. Hajde të ndryshojmë kushtetutën, por ta menderosim kushtetutën.
Sa kureshtje keni ju, besoj me këto që u përgjigja jam korrekt fare. Piramida e trillimit, mashtrimit e falsifikimit do të shembet dhe u garantoj se nuk pengoj asnjë proces hetimor, gjyqësor, etj”, tha Berisha.
