Izraeli po përgatit një pushtim tokësor të Gazës, tha kryeministri Benjamin Netanyahu në një deklaratë të mërkurën, por nuk dha detaje mbi një orar ose informacione të tjera rreth operacionit.
Vendimi se kur forcat izraelite do të hyjnë në enklavën palestineze, të kontrolluar nga Hamasi, do të merret nga kabineti i luftës speciale i qeverisë.
“Ne kemi vrarë tashmë mijëra terroristë dhe ky është vetëm fillimi”, tha Netanyahu, duke shtuar se “Në të njëjtën kohë ne po përgatitemi për një pushtim tokësor. Nuk do të them kur, si dhe për sa kohë. Gjithashtu nuk do të përmend llogaritjet e ndryshme që bëjmë, për të cilat publiku kryesisht nuk është në dijeni dhe kështu duhet të jenë gjërat”.
Kryeministri izraelit deklaroi se të gjithë luftëtarët e Hamasit janë “të vdekur”.
Netanyahu, i cili deri më tani nuk ka marrë përgjegjësinë për dështimet e sigurisë që çuan në sulmin e Hamasit, tha se të gjithë të përfshirët do të mbahen përgjegjës. “Skandali do të hetohet plotësisht. Të gjithë do të duhet të japin përgjigje, duke përfshirë edhe mua. Por e gjithë kjo do të ndodhë vetëm pas luftës”.
Izraeli ka vazhduar të bombardojë Rripin e Gazës me popullsi të dendur.
Më herët, duke cituar zyrtarë amerikanë dhe izraelitë, Wall Street Journal raportoi se Izraeli kishte rënë dakord të vononte pushtimin e Gazës për momentin, në mënyrë që Shtetet e Bashkuara të mund të forconin mbrojtjen raketore në zonë.
