E paevitueshme që do të përfundonte kështu, duke parë si u ndanë palët pak javë më parë. Orges Shehi tashmë e ka paditur Tiranën në Dhomën e Zgjedhjes së Konflikteve kundër pezullimit të vendosur nga Tirana. Tekniku ka kërkuar gjithashtu përmbushjen e detyrimeve financiare, ashtu si e parashikon kontrata. Në anën tjetër, presidenti Refik Halili, pasi lajmëroi një pezullim të paprecedent, jo shkarkim, tani pretendon se tekniku kampion dhe nënkampion në dy vitet e fundit me bardheblutë është paguar paradhënie deri në dhjetor.
Dikush, në këtë pikë, nuk thotë të vërtetën. Po përse një trajner me një skuadër pretendente, i mirëpaguar, do të donte të shkonte diku tjetër, si Halili deklaroi me pompozitet para gazetarëve? Apo, a është e mundur që pezullimi i trajnerit më jetëgjatë në pankinë të ketë ardhur për dy humbje? Këto janë pyetje për të cilat të gjithë e kanë një përgjigje, por e drejta do të jepet në Dhomën e Zgjidhjes së Konflikteve në FSHF, aty ku Shehi ka dërguar dosjen para 3 ditësh…
ÇFARË PËRMBAN PADIA
Kërkesa e teknikut 46 vjeçar është ajo për mos njohjen e pezullimit, me arsyetimin se nuk bazohet askund. Natyrisht edhe përmbushjen e detyrimeve financiare, ku specifikohet pjesa e prapambetur e pagave (nga korriku) dhe vijueshmëria e kontratës (deri qershor 2024).
Lexo më tej: Presidentit Halili nuk i del e keqja me Shehin, e tallën edhe tifozët rivalë: "Zgjedhja më e mirë"
Që cështja ka shkuar deri në këtë pikë, është tregues se negociatat për marrëveshje kanë dështuar. Shehi ka zgjedhur të ndjekë anën ligjore, larg të bërit zhurmë në media, presidenti Halili ka bërë të kundërtën. E tani Dhoma e Zgjidhjes së Konflikteve duhet t’i japë drejtim sportisti të mbajtur peng, në një çështje me shumë thumba.
REAGIMI I SHEHIT
Ikonik reagimi i Shehit ku ka mësuar pretendimin e presidentit Halili. Përmes një story në Instagram, tekniku ka zgjedhur një foto ku shfaqet i habitur, me shkrimin: “Ça thu mer burrë, se na habite fare…”. Më qartë se kaq?
