“Sot ishim pa Prençin dhe Liçon, kjo ishte arsyeja se pse ndryshova sistemin e lojës. Ndoshta kishim mundësi të bënim edhe 2-1 por prapë mos harrojmë, se Egnatia ka cilësi. Në 5 minutat e fundit të them të drejtën isha me mendimin të rrinim mbrapa në ekuilibër. Nëse do kishim mundësi për golin mirë, nëse jo, edhe me një pikë ishim të kënaqur". Ivan Gvozdenovic i sinqertë si gjithnjë tregon barazimin 1-1 me Egnatian. Kundër kryesuesve të kampionatit, Skënderbeu ka marrë 4 pikë në dy ndeshje, por luhatjet janë gjithësesi prezente: "Kemi oshilacione, kjo është e vërteta. Nuk kemi ende eksperiencë në Superiore dhe kjo është minus për ne. Por mund të them se edhe me barazimin sot lojtarët e kuptuan çfarë është e rëndësishme: që janë pikët. Superiorja është shumë e fortë. Prapë kemi Dinamon përballë shumë shpejt, por pozitive është që na kthehen lojtarë. Do punojmë për këto gjëra, do bëjmë më mirë në vazhdimësi”, tha Gvozdenovic.
Ajo që po e bën Skënderbeun të vuajë është mungesa e një shënuesi dhe Gvozdenovic e shpjegon kështu: "Për momentin kemi vetëm Sebastine, që është sulmues tipik 9, dhe të tjerët janë më shumë lojtarë krahu se sulmues. Kjo ndoshta është arsyeja pse jemi dobët në fazën sulmuese. Por kjo është situata deri tani".
NË VEND TË TETOVËS SHFAQET ASISTENTI BRAHJA
“Nuk është se e nënvlerësuam ndeshjen. Skënderbeu ka bërë ndeshje të mira në sezon, dhe një moment shpërqëndrimi erdhi goli. Isha i programuar unë të dilja, nuk ka lidhje pse nuk doli Tetova". Julian Brahja shpjegon me shpejtësi arsyen e mungesës së trajnerit para gazetarëve. Ndihmësi i Tetovës pastaj ka analizuar ndeshjen e barazuar 1-1 me Skënderbeun. "Ndoshta ndikoi dhe pauza e ndeshjes, u ftohën pak lojtarët por nuk do tja le asaj. Djemtë duhet të ishin më të kujdesshëm, ndeshja mbaron kur bie bilbili. Skënderbeu e rriti lojën në pjesën e dytë, vinin pas dy humbjeve dhe dhanë maksimumin. Shënimi i shpejtë i golit ka dhe të mira dhe të këqijat e veta" tha ai.
