“Lojtarët vuajnë nga ana psikologjike e rezultateve. Në pjesën e dytë nuk u qarkullua topi, duhej të hapnim më shumë hapësira, ndikon edhe fusha. Luajtëm me topa të gjatë dhe kjo i dha mundësi Dinamos. Qëndrojmë poshtë dhe e pranojmë golin shumë kollaj". Julian Ahmataj komenton i pakënaqur barazimin 1-1 me Dinamon. Nën drejtimin e tij, Tirana nuk fiton prej 3 javësh e pas dy humbjesh, barazimi nuk duket keq.
Tekniku sidoqoftë e sheh problemin te lojtarët: "Aktivizuam Hilën për agresivitet dhe grintë. Pavarësisht kësaj, loja u zhvillua mirë në pjesën e parë. Në të dytën nuk kishte logjikë, nuk mund të jemi me dy fytyra. Pas pësimit të golit skuadra e vuajti akoma më tepër anën psikologjike dhe nuk shprehej dot. Topi ishte shumë larg portës", tha Ahmataj.
Një moment i vështirë, por Ahmataj e merr me sportivitet, pavarësisht se skuadra është shumë më në vështirësi tani që ai është në detyrë: "Kjo situatë u ka ndodhur të gjitha skuadrave. Duhet të punojmë për ta kaluar këtë. Nuk është se Dinamo na e bëri të vështirë. Jemi të ndëshkuar edhe nga kartonat, por edhe nga dëmtimet. Shumë shpejt do të dalim nga kjo situatë. Të shohësh lojën, dominojmë por ndëshkohemi nga një moment, edhe ndaj Egnatias. Luajmë shumë mirë dhe kjo të jep shpresë. Po aktivizojmë lojtarë nga akademia për të plotësuar grupin me mungesat që kemi”.
MEHMETI: "PO TA KISHA SKUADRËN QË NË KORRIK..."
“Normalisht ka qenë një volum pune e jashtëzakonshme se kur ndërrohen trajnerët, secili ka filozofinë e tij. Sa i përket ditës sot, dua të falënderoj çunat për karakterin që treguan në derbi. Merita shkon për ata". Dritan Mehmeti debuton kështu edhe para mikrofonëve, pas barazimit 1-1 në derbin me Tiranën. Tekniku, që zëvendësoi Di Biaggio në pankinën e Dinamos sqaroi edhe situatën në të cilën gjeti skuadrën: "Lojtarët ishin të rënë psikologjikisht nga situata dhe rezultatet. Jam munduar të punoj në emocionet që i përcjell grupit dhe t’u jap besimin se ka elementë të mirë. Patjetër u kërkova që elementët të lidhin forcën e grupit, se pa grupin të gjithë bashkë nuk ia dalim".
Lexo më tej: Video/ Mehmeti debuton me pikë te Dinamo: Tirana nuk mund dot as vendin e fundit me 10 lojtarë
Mehmeti pastaj e coi gjuhën aty ku dhemb dhëmbi, duke lëshuar një thumbim të fortë për drejtuesit e klubit. "Mendoj që duhet të rrimë me këmbë në tokë se jam një natyrë që duhet të mbështetim punën te ndeshja e radhës. Gjithmonë punën time e bëj me plan afatshkurtër. Nëse do ta merrja skuadrën që në korrik, të bëja fazën përgatitore, ndoshta të ktheja përgjigje për objektivat. Sot mund të shkoj deri te Skënderbeu”, e mbylli Mehmeti.
