Egjipti nuk ka rënë dakord të presë palestinezët e zhvendosur nga Gaza, pavarësisht përpjekjeve intensive të Perëndimit. Lajmi u konfirmua nga një postim i presidentit Biden në X, ku ai shprehet se pas bisedës me homologun egjiptian, Abdel-Fattah El-Sisi, është rënë dakord për “të punuar së bashku dhe për të diskutuar mbi rëndësinë e mbrojtjes së jetëve të civilëve, respektimin e ligjit ndërkombëtar dhe garancitë se palestinezët e Gazës të mos zhvendosen në Egjipt apo ndonjë vend tjetër”.
Egjipti është në kufi me Gazën dhe është parë që në krye të herës si mundësi për zhvendosjen e palestinezëve. Por ndërkohë që Izraeli vazhdon sulmin në këtë zonë, Egjipti refuzon me këmbëngulje të hapë kufijtë për civilët palestinezë.
Të njëjtin qëndrim kanë mbajtur edhe vendet e tjera arabe, duke e vënë theksin te arritja e një marrëveshjeje paqeje, e ngritur mbi opsionin e zgjidhjes me dy shtete.
“Egjipti nuk ka pranuar dhe nuk do të pranojë zhvendosjen e palestinezëve nga Gaza në territorin e tij”, tha El-Sisi në një deklaratë të publikuar të dielën nga presidenca egjiptiane, të cilës i referohet Bloomberg.
Egjipti po përpiqet të marrë rolin e mediatorit mes Izraelit dhe Hamasit, të cilin SHBA e konsideron organizatë terroriste.
Sipas përllogaritjeve të OKB-së, më 24 tetor, nga Gaza, rreth 1.4 milionë njerëz ishin zhvendosur brenda territorit.
