Kryeministri socialist i Portugalisë, António Costa, dha dorëheqjen këtë të martë, për shkak të akuzave për korrupsion. Mediat e huaja raportojnë se ai ishte nën hetim dhe policia kontrolloi dhjetëra adresa, duke përfshirë rezidencën e tij zyrtare dhe ministritë e mjedisit dhe infrastrukturës.
Prokurorët portugez kanë hetuar për keqpërdorimin e fondeve, korrupsionin aktiv dhe pasiv nga figurat politike në koncesionet e minierave të litiumit në veri të vendit. Po hetohet gjithashtu një projekt i prodhimit të hidrogjenit dhe një qendër të dhënash që do të ndërtohet nga kompania Start Campus në Sines.
Shtypi portugez raporton se prokurorët thanë se ishin lëshuar urdhra arresti për shefin e shtabit të Costa, kryetarin e bashkisë së Sines dhe dy drejtuesit në Start Campus. Të paditur janë edhe ministri i infrastrukturës së Portugalisë, João Galamba, si edhe presidenti i bordit ekzekutiv të Agjencisë Portugeze për Mbrojtjen e Mjedisit (APA).
Duke folur të martën pasdite pas dy takimeve urgjente me presidentin e Portugalisë, Marcelo Rebelo de Sousa, Costa tha se kishte paraqitur dorëheqjen e tij, duke shtuar se ai kishte një ndërgjegje të pastër dhe besim të plotë te drejtësia dhe se si funksiononte ajo.
