Pritjes i erdhi fundi, Shqipëria do të njohë tashmë kundërshtarët me të cilët duhet të bëjë llogaritë në finalet e kampionatit Europian. Në aventurën e dytë në një kompeticion të tillë të UEFA-s, kuqezinjtë janë të pozicionuar si kurrë më parë, në vazon e dytë. Një situatë e tillë mund të favorizojë edhe kombinime të pranueshme, pavarësisht se edhe një grup Ferri mund të dalë nga shorti në Hamburg.
Nga vazo e parë, pashmangshmërisht do të dalë nga shorti një emër i madh. Franca, Spanja, Anglia e Portugalia janë ato kombëtare me të cilat pothuaj as nuk mund ta luash ndeshjen. Gjermania organizatore është në krizë e bashkë me Belgjikën, mund të ishin me impakt më të butë se katër të tjerët.
Pastaj nëse Shqipëria mund të zgjedhë nga vazo e tretë duhet shmangur Holanda dhe Kroacia, ndërsa nga e katërta Italia.
