Belgjika dhe grupi energjetik Engie kanë finalizuar marrëveshjen për të zgjatur funksionimin e dy reaktorëve bërthamorë në vend edhe për 10 vjet. Lajmi u bë i ditur nga Ministrja Federale e Energjisë, Tinne Van der Straeten, gjatë emisionit 'De Zevende Dag' të transmetuar në televizionin belg Vrt.
“Diskutimet politike do të fillojnë nesër. Javën në vijim do të ketë diskutime brenda qeverisë dhe gjithçka do t'i dorëzohet Këshillit të Shtetit”, bëri me dije Van der Straeten.
Në mars 2022, menjëherë pas shpërthimit të luftës në Ukrainë, qeveria federale e Belgjikës vendosi të mbajë në funksion dy termocentralet më moderne bërthamore, Doel 4 dhe Tihange 3, për të siguruar më pak varësi nga gazi natyror rus dhe i huaj. Pas negociatave të gjata me Engie, palët kishin rënë dakord përkohësisht në qershor për kushtet e zgjatjes në lidhje me afatet dhe financimin për çmontimin dhe menaxhimin e mbetjeve.
“Tashmë negociatat kanë përfunduar plotësisht dhe në tavolinë është një tekst prej 1500 faqesh”, shpjegoi Van der Straten, duke e cilësuar si absurde kërkesën e disa palëve për një zgjatje me njëzet vjet në vend të dhjetë. Për dritën jeshile përfundimtare do të jetë i nevojshëm edhe miratimi i Komisionit Evropian.
