Edi Rama nuk kërkon kaos nesër në Kuvend, as flakadanë, karrige të përmbysura apo tymuese. Është seanca ku do të votohet Buxheti i Shtetit nën për nen.
Për këtë sot pasdite është marrë vendimi nga Komisioni për Çështjet e Etikës në Kuvend, që të përjashtohen me disa ditë nga seancat deputetët: Sali Berisha, Gazmend Bardhi, Albana Vokshi, Flamur Noka, Elda Hoti, Edi Paloka, mëson Lapsi.al nga një burim pranë Parlamentit.
Takimi i këtij komisioni nuk ka qenë i hapur për mediat dhe as i njoftuar më parë. Praktikisht janë përjashtuar drejtuesit kryesorë të betejës politike që Grupi Parlamentar i PD ka nisur javët e fundit.
Vendimi i Komisionit për Çështjet e Etikës është marrë nisur nga incidentet e seancës së të hënës, ku pati sërish karrige të përmbysura dhe flakadanë.
Mbetet për t’u parë se çfarë qëndrimi do të mbajnë deputetët e përjashtuar. Me siguri do të shohim konfrontim tjetër me punonjësit e Gardës së Republikës në hyrje të Parlamentit.©LAPSI.al
