Në mes të të gjithë të pyeturve nga Barometri në Euronews Albania, për perceptimin e lartë të korrupsionit në vend, ata që dallojnë në mes të këtij perceptimi janë votuesit e Partisë Socialiste. Rezulton se Socialistët janë shumica (50.4%) e atyre që mendojnë se në 5 vite korrupsioni në Shqipëri është ulur.
Diferenca mes tyre dhe votuesve të Partisë Demokratike është shumë e madhe, këta të fundit zënë vetëm 8.9 % të të gjithë atyre që mendojnë se korrupsioni është ulur në 5 vite e fundit, në vendin tonë.
Ky trend i perceptimit të socialistëve vërtetohet edhe kur pyeten për eksperiencën e tyre të drejtëpërdrejtë krahasuar me 5 vite më pare. Edhe në këtë matje, ata janë shumica (56.2%) e atytre që mendojnë se korrupsioni është ulur.
Këto shifra të socialistëve rriten edhe më shumë kur pyeten: “Sa herë ka ndodhur vitin e fundit që familjarë apo të njohur të tyre kanë paguar rryshfet?” Socialistët janë 62 % e atyre që thonë “asnjëherë”.
Kur i pyet edhe për eksperiencën personale nëse kanë paguar rryshfet; 72.7% e atyre që thonë “asnjëherë” janë socialistë.
Barometri në Euronews Albania pasi mati besimin e qytetarëve për SPAK dhe institucioneve të reja të drejtësisë, të cilat rezultuan në nivelet më maksimale, këtë të premte solli opinionin e tyre për nivelin e korrupsionit në vend.
Gjetjet e javës së fundit, nga të dhënat e mbledhura në terren nga ekipi i Datacentrum, thonë se pavarësisht besimit maksimal tek SPAK dhe drejtësia, për qytetarët shqiptarë, korrupsioni në vend vazhdon të jetë në nivele shumë të larta.
Në total janë 82.1 % e qytetarëve që mendojnë se qeverisja është tërësisht e korruptuar apo ka shumë korrupsion. Në krahasim me një vit më pare, rënia e këtij perceptimi, është e ulët.
Në nëntor të 2021 perceptimi i qytetarëve për korrupsionin në qeverisje ka qenë afërsisht 10 pikë në përqindje më lart se sot, ose 91.8 % krahasuar me 82.1 %.
Këto matje, si për besueshmërinë tek SPAK-u ashtu edhe në perceptimin e korrupsionit, tregojnë qartazi se megjithë mbështetjen dhe besimin e qytetarëve, organet e reja të drejtësisë, ende nuk kanë arritur të kenë efekt të drejtpërdrejtë në uljen e nivelit të korrupsionit në Shqipëri. /Marrë nga Euronews Albania
