Dy episode shumë të diskutueshme që do të shkaktojnë polemika në sfidën mes Genoa e Juventus. Veçanërisht, bardhezinjtë protestuan shumë në minutën e 53', kur rezultati ishte 1-1 (Chiesa me penallti e barazim i Gudmundsson). Një krosim nga e djathta i Cambiaso u ndërpre në zonë me një prekje me dorë nga Bani, pasi u përplas në kofshën e vetë mbrojtësit kuqeblu. Arbitri Massa, pas kontrollit në VAR të Fabbri, vendosi të mos ndërhynte dhe as të rishikonte një episod delikat. Ashtu siç shpjegon moviolisti i Mediaset, ish-arbitri Graziano Cesari, ky rast meritonte një analizë të thellë në monitor: "Në krosimin e Cambiaso është impakti në krahun e hapur të Bani. Krahu është shumë i hapur në krahasim me trupin e tij. Prisja një ndërhyrje nga VAR Fabbri që ta ftonte arbitrin Massa në rishikim, por ai heshti".
I njëjti mendim nga Cesari edhe për kartonin e verdhë të Malinovskyi pas një ndërhyrje të rëndë ndaj Yildiz në mesfushë: “Në minutën e 90 ndërhyrja e Malinovskyi ndaj kundërshtarit u ndëshkua me karton të verdhë. Në rrëshqitje këmba e majtë e lojtarit të Genoa godet kërcirin e kundërshtari. Gjithashtu në këtë rast prisja një ndërhyrje nga VAR-i, i cili përkundrazi e shmangu atë".
Lexo më tej: Penalltia e Inter shpërthen polemikat: “Po çfarë Var, kështu është Bar”. Cesari mbron arbitrin Di Bello
Megjithatë, nuk ka dyshim për penalltinë e dhënë për Juventus në pjesën e parë. Chiesa përfitoi nga një gabim i Badelj dhe kaloi Martinez, i cili nuk mundi të bënte asgjë tjetër përveçse ta rrëzonte. Penallti shumë evidente, të cilën e konvertoi vetë sulmuesi i Juventus.
