Sali Berisha u ka bërë thirrje të rinjve të ngrihen në protestë për të rivendosur demokracinë duke e krahasuar veten me sinjalin e Batman që ndizej në Gotham City sa herë banorët kishin nevojë për ndërhyrjen e tij. Por Berisha tha se ai nuk ishte heroi që mendonin të gjithë, sepse heronjtë janë të rinjtë.
"Dëgjoj dhe më shkruajnë se ti je Sali je shpresa. E vërteta është tjetër. E vërteta është se për të rinjtë, unë nuk jam heroi i tyre, por jam thjesht si sinjali në filmin Batman që fton heronjtë nga qielli. Dhe unë, kam bindjen se ata heronj janë djemtë dhe vajzat e Shqipërisë, janë ata të cilët të angazhuar në këtë betejë vendimtare, të angazhuar në këtë betejë për shpresën, për të ardhmen, do t’i japin kthesën, do të bëjnë që kjo erë kthese dhe shprese të fryjë në mbarë Shqipërinë dhe opozita, demokracia të rivendoset përsëri" u shpreh Berisha nga dritarja e shtëpisë së tij ku qëndron në arrest shtëpie.
Rrugica ku banon Berisha në Tiranë është shndërruar në një destinacion pelegrinazhi nga demokratët që protestojnë kundër arrestimit të liderit të tyre që është nën hetim për privatizimin e kompleksit Partizani. NDaj Berishës nuk ka asnjë akuzë, por ai refuzoi masën e gjykatës speciale që i sekuestroi pasaportën dhe e detyronte të paraqitje dy herë në javë para oficerëve të policisë gjyqësore, sepse SPAK nuk iu drejtua parlamentit kur kërkoi këtë masë.
[video width="640" height="368" mp4="https://cdnimpuls.com/lapsi.al/wp-content/uploads/2024/01/Berisha-ne-dritare-fjalim.mp4"][/video]
