Një javë pas atentatit mafioz në Vlorë, ku u ekzekutua me snajper 22-vjeçari Gëzim Sinomati, sot është shënuar një episod i tepërt e deri në kufijtë e qesharakes nga ministri i Brendshëm, Taulant Balla.
Ai ka dekoruar për merita të veçanta për trimëri në luftën ndaj krimit drejtorin e policisë së qarkut Vlorë, Ermal Muçaj. Vlerësimi i është dhënë Muçajt gjatë ceremonisë për 111 vjetorin e themelimit të Policisë së Shtetit, që u zhvillua në Akademinë e Sigurisë.
Duket disi absurde se si mund të jepet një dekoratë e tillë kur para disa ditësh në mes të Vlorës ekzekutohet në mënyrë mafioze një i ri dhe autorët largohen nën hundën e policisë, djegin makinën dhe deri më sot s’dihet asgjë rreth tyre.
Me siguri që Taulant Balla do ketë pasur parasysh merita të tjera për Ermal Muçën, pasi nën drejtimin e tij dhe shefit të komisariatit Himarë, u përgatit arrestimi i Fredi Belerit me akuzën për blerje votash. Siç u mësua më pas gjatë procesit gjyqësor, Beleri ra në kurthin e ngritur prej të infiltruarit të policisë, Arsen Rama. ©LAPSI.al
