Gjyqtarja e Gjykatës së Shkallës së Parë në Tiranë, Arnisa Këlliçi kërkoi të shtunën të merret në mbrojtje. Shkak sipas saj është bërë një letër kërcënuese në adresë të saj dhe familjes së saj. Në një letër me kaligrafi të keqe të shkruar me dorë, të cilën e ka siguruar edhe lapsi.al kërcënuesi përmend dy fëmijët e gjyqtares.
“E dashur gjyqtare Arnisa. Keni dy fëmijë dhe mendoni për ta. Si mund të rroni ju e jo ata e kjo është e vërtetë. Me respekt” – shkruhet në letër.
Në kërkesën e saj për mbrojtje, gjyqtarja tregon se veç letrës ajo është vënë në dijeni nga Kancelari i Gjykatës se ndaj saj ka pasur një kërcënim me jetë.
“Para pak ditësh më është bërë me dije nga Kancelari i kësaj Gjykate që kundrejt meje, gjyqtares Arnsa Këlliçi, ka patur një kërcënim me jetë. Për këtë fakt unë nuk kam prova, por më është bërë me dije se ka një kallëzim të depozituar nga ana e Kancelarit të Gjykatës së Shkallës së Parë të Juridiksionit të Përgjithshëm Tiranë.
Sot më datë 20.01.2024, më ka ardhur një letër kërcënuese, që me aq sa mund të deshifroj përmban kërcënime për mua, fëmijët e mi dhe familjen time. Unë nuk mund të atestoj në asnjë moment për vërtetësinë e kësaj letre. Thënë kjo, për çdo eventualitet, unë kërkoj një mbrojtje të posaçme, për aq sa ju e shihni të nevojshme”, - thuhet në letrën e gjyqtares. KLGJ do të mblidhet për të vendosur për kërkesën e gjyqtares. ©LAPSI.al
LEXO EDHE: Gjyqtarja merr letrën kërcënuese, kërkon mbrojtje të posaçme në KLGJ
