Bashkëshortja e disidentit rus Vladimir Kara-Murza tha të hënën se ai ishte larguar nga një burg në Siberi, ku po mbahej që nga shtatori dhe ajo nuk e dinte se ku e kishin transferuar autoritetet. Evgenia Kara-Murza shkroi në platformën X se burri i saj, i cili vuan nga një çrregullim nervor pasi i mbijetoi dy helmimeve, kishte qenë në izolim gjatë 4 muajve që ai kishte kaluar në burgun famëkeq IK-6 në Omsk.
Kontakti me të burgosurit mund të ndërpritet për periudha të gjata gjatë transferimit të tyre me trena dhe makina mes burgjeve në distanca të largëta të sistemit penal të Rusisë. Në dhjetor, familja dhe avokatët e udhëheqësit të opozitës humbën kontaktet me të për gati tre javë, ndërsa ai po transferohej në një burg në Arktik.
Shërbimi rus i burgjeve nuk iu përgjigj një kërkese për koment mbi vendndodhjen e zotit Kara-Murza. Politikani rus u dënua me 25 vjet burg prillin e kaluar për tradhti dhe përhapje të "informacionit të rremë" rreth luftës së Rusisë në Ukrainë. Ai i mohoi akuzat dhe e krahasoi gjyqin ndaj atij me gjyqet staliniste të viteve 1930.
Kara-Murza, 42 vjeç, vuan nga një sëmundje, që quhet polineuropati, e cila nëse nuk trajtohet me ilaçe dhe ushtrime, shkakton humbje të ndjesisë tek gjymtyrët. Bashkëshortja e tij ka shprehur frikën se ai mund të jetë në rrezik për jetën. Në dy incidentet e helmimit në 2015 dhe 2017, zoti Kara-Murza ra në koma. Edhe Alexei Navalni i mbijetoi helmimit me një agjent nervor në vitin 2020.
Vladimir Kara-Murza, i cili ka edhe pasaportë britanike, është në mesin e një numri të vogël figurash të shquara të opozitës që qëndruan në Rusi dhe vazhduan të flisnin kundër Presidentit Vladimir Putin pas fillimi të sulmit në shkallë të gjerë të Moskës ndaj Ukrainës në shkurt të vitit 2022. /VOA
