Mediat greke kanë publikuar video të të shumëkërkuarit shqiptar, 35-vjeçarit nga Fieri Elis Salaj, i cili edhe pse akuzohet për vrasje shëtit i lirë në shtetin grek. “Zougla” ka nxjerrë imazhe të shqiptarit, teksa pozon në rrjete sociale krah një grupi personash. Sipas kësaj media, burimet policore kanë bërë me dije se ka qenë pikërisht pistoleta e Salajt ajo që ka rezultuar se ka shtënë ndaj 39-vjeçarit nga Delvina Pëllumb Islami në ngjarjen e 21 shkurtit 2023 në Nea Ionia të Athinës.
Pavarësisht kësaj, Salaj, i cili rezulton pjesë e grupit kriminal të vetëquajtur “Lions”, vazhdon të shëtisë i lirë. Ky grup kriminal qendrën e ka në lokalin e famshëm “BellaVita” në Athinë, nga ku akuzohen se kanë planifikuar e kryer më pas krime të rënda në Greqi dhe janë të përfshirë në trafiqe të paligjshme. Jashtë këtij lokali nate, disa ditë më parë policia greke arrestoi me pistoletë TT pa leje një 36-vjeçar bullgar, i cili rezultoi lidhje e ngushtë me shqiptarët.
Më herët për vrasjen e Pëllumb Islamit janë ndaluar edhe 34-vjeçari Olsian Nurixhi alias Ernest Nurixhi si dhe një 24-vjeçar shqiptar i njohur si “Dhimitri” apo “Nektarios”. Disa kohë më parë, mediat greke zbuluan informacione të dispononte policia greke se anëtarët e “Lions” kishin konflikte të hapura edhe me dy vëllezërit grekë Strato dhe Jani Lala, të arrestuar më pak se një vit më parë për vrasjen e gazetarit investigativ grek Girogos Karaivaz dhe të boksierit Hari Kontogiorgi.
Grupi “Lions” dhe lokali “BellaVita” dyshohet se kanë lidhje me një personazh të njohur të botës së krimit, i burgosur në Greqi për trafik kokaine nga Amerika Latine dhe me disa ngjarje të tjera të rënda në shtetin fqinj.
