Në një letër të përbashkët drejtuar institucioneve qeveritare, 28 organizata të shoqërisë civile kërkuan pezullimin e përpjekjeve të shumicës për ndryshimet në ligjin për ruajtjen e Zonave të Mbrojtura, por edhe zbatimin e një procesi vendimmarrje në vijë me direktivat europiane.
“Shqetësimet tona vijnë pas vërejtjeve të paraqitura përmes platformës online të Kuvendit dhe gjatë seancës së parë online me Shoqatën Ornitologjike Shqiptare AOS, ku theksojmë se diskutimet janë kufizuar ngushtë vetëm në dy prej komisioneve parlamentare”, shkruajnë mjedisorët.
Sipas tyre qasja anashkalon përfshirjen kyçe të Komisionit për Çështjet Evropiane, i cili është thelbësor për të siguruar që projektligji të përputhet me direktivat e BE-së dhe standardet ndërkombëtare.
Ndryshimet ligjore erdhën si nismë e disa deputetëve socialistë dhe parashikojnë hapjen e rrugës ndaj investimeve dhe aktivitetit industrial në Zonat e Mbrojtura natyrore, duke ulur nivelin e mbrojtjes së tyre dhe duke u dhënë bashkive të drejtë administrimi mbi këto territore.
Si rrjedhojë, Organizatat e Shoqërisë Civile dhe mjedisorët kanë kundërshtuar këtë projektligj dhe kërkuan shtyrjen e seancës plenarë të Kuvendit që ishte caktuar fillimisht për datën 15 Shkurt.
“Në bëjmë thirrje që projektligji të rishikohet fillimisht nga Komisioni për Çështjet Europiane”, insistojnë aktivistët në letrën drejtuar institucioneve qeveritare./BIRN
