Egnatia ishte skuadra e fundit që i kishte mundur në kampionat, 10 javë më parë e tani Vllaznia i kthen reston në Loro Boriçi. 2-1 imponohen të besuarit e Osmanit, përballë kryesuesve të kampionatit, duke ngushtuar distancën mes tyre në 8 pikë. Vendosën golat e Balajt dhe Grudës, ndërsa barazoi momentalisht Ndreca me një super gol.
Rrogozhinasit ishin edhe macja e zezë e shkodranëve, që nuk i mundnin që nga maji i vitit 2022. Këtë herë gjithcka nisi si duhet me golin e shpejtë të kapitenit Balaj në minutën e 2’. Një aksion në të djathtë e Çoba shërbeu në qendër, ku Dulisse gaboi ndërhyrjen, duke i dhënë mundësinë Balajt të ndëshkonte Sherrin.
Rrogozhinasit reaguan shpejt. Montenegro goditi shtyllën, pas një veprimi brilant në hyrje të zonës, në minutën e 14’. Barazimi megjithatë duhet të priste një gjysëm ore lojë. Ndreca lëshoi një trinë të plotë duke mos i lënë asnjë shans Qarrit.
Lexo më tej: Video/ Shehi hakmerret me Tiranën, Skuka e Cara përmbysin derbin: Ahmataj tani rrezikon 'Final Four'
Sidoqoftë, lëvizja e dyfishtë e Tetovës me Malotën e Zejnullahin për Drame dhe Dulisse menjëherë pas pushimit nuk pati kohë të jepte efekt, sepse në minutën e 52’ Gruda siluroi Sherrin me një të djathtë precize. Tetova pëson humbjen e parë të 2024-ës, duke lejuar afrimin e menjëhershëm të dyshes ndjekëse Partizanit, e pikërisht Vllaznisë, që e zbukuroi kampionatin, duke e ngushtuar distancën me kreun në vetëm 8 pikë. Vllaznia festoi në mënyrën më të mirë të mundshme 105-vjetorin e saj dhe tani është e kotë të fshihen, sepse objektivi është titulli kampion.
