Parlamenti hungarez mund të ratifikojë anëtarësimin e Suedisë në NATO kur të mblidhet për sesionin e ri pranveror gjatë këtij muaji.
Lajmi është bërë i ditur na kryeministri Viktor Orban.
“Është një lajm i mirë që mosmarrëveshja jonë me Suedinë do të zgjidhet së shpejti. Ne po shkojmë në drejtimin që në fillim të seancës pranverore të parlamentit të mund të ratifikojmë pranimin e Suedisë në NATO”, tha ai.
Parlamenti hungarez mblidhet përsëri më 26 shkurt. Suedia aplikoi për t’u bashkuar me NATO-n gati dy vjet më parë në një ndryshim historik në politikë të nxitur nga pushtimi i plotë i Ukrainës nga Rusia.
Orban tha se ai dhe kryeministri suedez Ulf Kristersson kishin ndërmarrë hapa “për të rindërtuar besimin” midis dy vendeve të tyre, megjithëse nuk specifikoi se cilat ishin këto hapa.
Hungaria është i vetmi vend i NATO-s që nuk e ka ratifikuar ende kërkesën e Suedisë, një proces që kërkon mbështetjen e të gjithë anëtarëve të NATO-s.
Vonesa ka acaruar marrëdhëniet me Shtetet e Bashkuara dhe ka ngritur shqetësime midis aleatëve të saj.
