Barazimi i dytë radhazi për Erbim Fagun, pas atij me Teutën në Kupë, që kur tekniku ka marrë detyrën. Tirana nuk ka shkuar më shumë se barazimi 1-1 në ndeshjen kundër Laçit, e luajtur në “Elbasan Arena”. Myrta i hoqi fitoren bardhebluve me golin e shënuar në minutën e 78', duke iu përgjigjur avantazhit të Lushkjas, kur bardhezinjtë luanin me 10 lojtarë.
Laçi kërkonte të rikuperonte pikë për tu afruar në zonën e Final Four, ku duhet të kalonte më parë Tiranën, që e paraprinte në renditje. Josa kërkonte ta fitonte takimin e javës së 25 të Superiores, ashtu si edhe Tirana, duke i dhënë jetë një ndeshje me emocione. Tirana pati shansin ideal, kur kurbinasit mbetën me 10 lojtarë. Kartoni i kuq i Paulo Silva në minutën e 18’ ndryshoi lojën e Josës, që u mundua të kontrollonte.
Bardhezinjtë e bënë mirë deri në minutën e 54’, kur Regi Lushkja shënoi golin klasik të ish-it. Avantazhi i Tiranës u duk se mund të mbyste shpresat e Laçit, i thirrur për të rikuperuar një rezultati me një lojtar më pak. E megjithatë, Tirana lëshoi atëherë kur nuk duhej dhe u befasua në minutën e 78’. Myrta, i cili kishte vetëm disa sekonda që ishte në lojë, barazoi rezultatin, duke i dhënë Josës një pikë të çmuar.
Lexo më tej: Najdovski në thyerje të plotë me klubin: Tirana bën prova rehabilitimi të kapitenit
Dështojnë bardheblutë të përfitojnë nga humbja e atyre që qendrojnë më sipër në renditje, Dinamo e Partizani, edhe pse nëndetësen e kanë arritur në renditje. Tirana ngjitet në vendin e katërt, me 35 pikë, po aq sa dhe Dinamo, teksa Laçi ndodhet mes mbijetesës dhe “Final 4” me 30 pikë të grumbulluara në vendin e 7.
