“E dinim që do të ishte një ndeshje e vështirë. Shënuam dy herë, mbajtëm topin në këmbë, nuk u vumë nën presionin e kundërshtarit. Arritëm një fitore shumë të rëndësishme për ne". Edi Martini i gëzohet një prej fitoreve më të rëndësishme në këtë kampionat. Teuta ka parakaluar Erzenin, duke u larguar nga zona e rënies. "Edhe në Rrogozhinë nuk pësuam gol, edhe sot nuk pësuam. Nga ndeshja në ndeshje, djemtë kanë rëndësi që të rrisin besimin te vetja. Por duke mos pësuar është një armë plus që të jep besimin për të vazhduar përpara".
Nuk është se ka shumë kohë për të festuar sepse në mesjavë vjen Kupa dhe Teuta kërkon një kualifikim për të vazhduar të ëndërrojë Europën në një sezon të vështirë: "Është ndeshje shumë e rëndësishme për ne. Është mënyra e vetme që të tentojmë Kupat e Europës. Mendoj se kemi një gjendje optimale deri ditën e mërkurë. Do shkojmë të tentojmë gjithçka për gjithçka", tha Martini.
BEJZADE: "GABIME TË PAFALSHME PËR NJË EKIP MBIJETESE"
“Ne po na përsëritet si ndeshja me Skënderbeun. Morëm shumë gjëra përsipër. Ekipi u fut nën trysni. Ekipi bëri gabime që s’duhet t’i kishte bërë. Janë të pafalshme te një ekip për mbijetesë, të mos kesh përqendrim. Gabuam dhe u ndëshkuam. Për të ardhur keq". Skerdi Bejzade bën një analizë të shpejtë të disfatës 3-0 me Teutën, që e zbret sërisht në zonën e rënies. Tekniku tashmë duhet të përpiqet të ndryshë luhatjet e të tijve, edhe pse duket e vështirë: "Problemet janë ato që thamë. Ne e kishim përgatitur si do luante Teuta dhe pikërisht ato gabime bëmë. Edhe kur fitonim topat, nuk arritëm të bënim dy-tre pasime që të dilnim në sulm. Nga ndeshja në ndeshje janë shumë të paparashikueshëm".
Lexo më tej: Teuta, tris në derbi e parakalim mbijetese: Lloci, Beqja e Daci shkatërrojnë Erzenin
Mendja te Kupa, ku është një fitore për tu mbrojtur, por në Shkodër kundër një ekipi në shëndet të plotë do të jetë e vështirë: "Ekipi nga loja në lojë bën shumë ndryshime. Me Vllazninë mund të luajmë shumë herë më mirë se sot. Duhet të përmirësohemi, të stabilizohemi, por nuk kemi shumë kohë”, u mbylli Bejzade.
