“Një fillim i rezervuar, i kujdesshëm. I dhamë golat në pjesën e parë, kishim një lojtar tepër. Nuk shfrytëzuam disa raste në pjesën e dytë, e morëm golin siç e patë si e morëm. Deri në përfundim të 90 minutave na mungonte ideja. Ndoshta jo neglizhencë, por shumica e lojtarëve, në ndeshjet e fundit i kanë luajtur 90 minuta”. Qatip Osmani nuk është se është bindur nga fitorja 6-1 me Erzenin, duke qenë se kualifikimi erdhi pas kohëve shtesë e me shijakasit me 10 lojtarë.
Tekniku i Vllaznisë pranon edhe gabimet e bëra nga të tijtë, që vështirësuan kalimin për në katërshe: “Gabuam në vendosje, edhe pse kishim një lojtar më tepër. Nuk ishim të rrezikshëm. Mungonin lëvizjet veçanërisht të mesfushorëve. Mendoj se aty e kishim atë problem, sepse dhe pasimi i fundit nuk ishte i saktë”, tha Osmani.
DELIALLISI AKUZON: “VETËM ARBITËR NUK ISHTE”
“Ne kishim ardhur për të dhënë gjithçka nga vetja dhe për të marrë kualifikimin. Më duhet të falenderoj lojtarët nga i pari te i fundit. Nuk më takon mua të flas për arbitrat, por nga mënyra se si arbitroi ndeshjen, vetëm arbitër nuk mund të jetë. Mund të jetë arbitër vetëm për U-13”. Alfred Deliallisi, i rikthyer në pankinën e Erzenit, ka shpërthyer në akuza ndaj arbitrit Orlando Kuka. Në shënjestër të teknikut të shijakasve ka qenë pikërisht ai që duhej të vendoste drejtësi e jo vetëm për kartonin e kuq ndaj mbrojtësit Atanda, pas rishikimit në VAR.
Lexo më tej: Vllaznia në gjysëmfinale, por sa vuajtje: Erzeni me 10 lojtarë e çon sfidën në shtesë, pastaj shthuret 6-1
Deliallisi pastaj përqendrohet te kampionati, ku duhet të udhëheqë skuadrën për të dalë nga zona e rënies nga kategoria: “Problemin e konkurencës nuk e kam. E kam të qartë se cilët lojtarë do të luajnë. Vetëm ata që vrapojnë dhe sakrifikojnë. Kampionati është në ato kushte që duhen pikët. Duhet të jemi të bashkuar dhe të tregojmë karakter për të vazhduar përpara”.
