Deputeti i pavarur, Agron Shehaj u shpreh sot se ndryshimi i ligjit për Zonat e Mbrojtura shuan përfundimisht çdo shpresë për pronarët.
Sipas Shehajt, Rama do të vendosë se kush prej këtyre pronarëve do japë tokën për ndërtim, kujt prej ortakëve të Ramës dhe me cilat kushte.
Reagimi i Shehajt
Ka me mijëra pronarë tokash në Shqipëri që kanë një ëndërr: Të zhvillojnë pronat e tyre, por nuk munden sepse ato ndodhen në Zona të Mbrojtura. Ndryshimi i ligjit për Zonat e Mbrojtura shuan përfundimisht çdo shpresë për ta.
Me ndryshimin e ligjit, Rama do vendosë se kush prej këtyre pronarëve do japë tokën për ndërtim, kujt prej ortakëve të Ramës do ia japë dhe me cilat kushte.
Ndryshimi i ligjit të Zonave të Mbrojtura e bën Edi Ramën dhe ortakët e tij pronarë “De Fakto” të çdo prone në Zonat e Mbrojtura në Shqipëri.
Në një shtet normal bëhen ligje në mënyrë që pavarësisht se kush është në pushtet, qytetarët të kenë të njëjtat mundësi dhe të drejta. Ne Shqipëri ndodh e kundërta, ligjet bëhen në shërbim të qeverisë, që ministrat të marrin tokat më të mira, të shpallen Investitorë Strategjik dhe të ndërtojnë resorte.
