Në tubimin e përditshmë poshtë shtëpisë së tij, ish-kryeministri Sali Berisha tha se Rama u bë i famshëm për lidhjet e tij me krimin dhe se pasojat e kanabizimit të vendit shihen në rënien e eksporteve dhe te çmimet e larta të apartamenteve.
"Miqtë e mi, droga është një helm i tmerrshëm jo vetëm për shëndetin e njeriut, por është një helm i tmerrshëm për qytetarët, për shoqërinë.
Do ju jap vetëm dy shembuj për pasojat e tmerrshme të drogës së Edi Ramës. Dje u njoftua se eksportet nga Shqipëria në muajin shkurt ishin 16 përqind më pak se sa një muaj më parë.
A e dini se çfarë do të thotë kjo? Kjo do të thotë se sektori numër 1 i punësimit në Shqipëri, që janë eksportet, detyrohet të shkurtojë 16 % të të punësuarve. 16 % vende pune më pak.
Po pse kjo? Sepse droga zëvendësoi në këtë vend euron me narkoeuron. Sepse droga e uli në nivele katastrofale shkëmbimin e euros me lekun dhe bëri që sipërmarrjet e eksportit të falimentojnë njëra pas tjetrës, të largohen nga Shqipëria.
Dhe kjo vetëm e vetëm se narkoeurot vranë me kursin e këmbimit me lekun, sipërmarrjet e tyre. Po droga, një efekt tjetër të tmerrshëm. Hidhni sytë te kulla, monumente të drogës dhe korrupsionit.
A e dini miq se në Tiranë janë çmimet më të larta të apartamenteve në Europë pas Mynihut dhe Parisit?
Çfarë do të thotë kjo? Kjo do të thotë se asnjë i ri shqiptar nuk mund të ndërtojë, sado i aftë të jetë, ëndrrën e tij, folenë e tij në Tiranë.
I duhet të punojë, 60-80 gjer 100 vite për të blerë një apartament sepse droga dhe narkoeurot i mbajnë çmimet në stratosferë. Këto janë rezultatet që prekin pra vendin e punës. Prekin të ardhmen e çdo qytetari shqiptar.
