Kili ka lënë një traumë të fortë mbi të gjithë te tifozët, sepse lojtarët nuk duket se e kuptuan mirë atë që bënë përpara 15 mijë tifozëve kuqezinj në Parma. E kështu, pas sfidës demoralizuese 0-3 me amerikano-jugorët, kuqezinjtë zhvilluan edhe një seancë të lehtë stërvitore në 'Ennio Tardini', përpara se të udhëtonin drejt Suedisë. Nisja është bërë pasdreken e djeshme, ndërsa në Stokholm sot janë programuar konferenca zyrtare për shtyp e teknikut Sylvinho dhe stëvitja e fundit para ndeshjes.
Departamenti i Komunikimit në FSHF bën me dije se Etrit Berisha ka udhëtuar me ekipin për sfidën ndaj Suedisë. Pas dëmtimit të pësuar, gjendja e portierit kuqezi është më e mirë dhe do të monitorohet gjatë gjithë kohës nga stafi mjekësor. Sidoqoftë, ndryshime do të ketë, duke filluar nga porta. Nëse Berisha nuk ja del, gati është Kastrati, i vetmi nga portierët që luan titullar.
PROVAT NË ITALI
Në seancën e fundit në Itali, lojtarët që u aktivizuan titullarë me Kilin zhvilluan vetëm disa ushtrime fizike dhe pa top. Ndërsa futbollistët që nuk u aktivizuan apo hynë në fushë si zëvendësues bënë stërvitje më të ngarkuar dhe taktike. Sylvinho nuk mund të jetë i kënaqur nga ajo që pa me Kilin, zhgënjyes pothuaj të gjithë, me ndonjë sinjal interesant nga Muçolli e me garancitë e zakonshme të Gjimshitit që nuk mjaftojnë, duke parë se prapavija fuste ujë nga të gjitha anët.
LËVIZJET E STOKHOLMIT
Përpra Suedisë, tekniku sipas komunikimeve të pas ndeshjes, ka ndërmend të bëjë lëvizje të forta. Manaj e Broja mund të kenë shansin e tyre edhe njëherë ("është e pamundur ti vlerësoj me kaq minuta"), por lojtarët para se gjithash duhet të lënë pas egocentrizmin që po i kondicionon karrierën. Koha për Kumbullën nga minuta e parë, me Mihajn që pothuaj e përjashtoi veten nga 23 e Europianit, i keqtrajtuar nga Vargas, Sanchez e Bolados.
Lexo më tej: Sylvinho flet pas humbjes: Ju them ku gabuam, por goli i parë duhej anuluar
Mesfusha do të ketë të njëjtët protagonistë, me ndryshim të Muçit, që mund të marrë vendin e Bajramit, dukshëm jashtë forme dhe jo mirë psikologjikisht. Pëpara Hoxha e Muçolli mund të kenë mundësinë e tyre, ndërsa Broja e Manaj do të diskutojnë vendin në majën e sulmit. Sfida Suedi-Shqipëri do të luhet më datë 25 mars në ora 19:00, në stadiumin “Friends Arena”.
