Nisma Thurje, ka kallëzuar në Prokurorinë e SPAK ministrat e infrastrukturës dhe financave, për proçedurën e dhënies me konçesion të portit të Vlorës dhe dhënien e truallit prej 57 mijë metra katrorë me qira 1 euro për kompleks rezidencial.
Pano Soko nga Nisma Thurje ngriti dyshime se procedurat e dhënies së konçesionit për portin nga ana e ministris infrastrukturës dhe energjisë, si dhe dhënia e 57 mijë metra katrorë truall në pronësi publike janë bërë në kundërshtim me ligjin, duke shkelur barazinë në tendera dhe ka dëmtuar interesat e shtetit. Ai gjithashtu u shpreh se ministria e financave përmes veprimeve dhe mosveprimeve të saj ka lejuar ndryshimin e aksionerëve që kanë fituar tenderin, duke ngritur dyshimet mbi një skemë me përfitues të fshehtë, ku disa kompani hyjnë në garë fiktivisht vetëm për përmbushjen e kritereve të kërkuara ekonomike, teknike dhe të eksperiencës, por largohen me të përfunduar procedurat konkuruese, duke ia lënë administrimin përfituesit real. Për këto arsye ai kërkoi nga SPAK nisjen e hetimeve për zyrtarët e lartë të përfshirë në këto procedura, si dhe në sigurimin e padisë, duke pezulluar punimet. Ndërsa Endrit Shabani u shpreh se ky kallëzim është një nga ‘xhevairët e korrupsionit qeveri-oligarki përmes skemave të PPP-ve”, të cilat po e lënë Shqipërinë një vend të varfër, duke i gllabëruar tokat publike, plazhet, ishujt dhe zonat historike. Ai theksoi se Nisma Thurje është i vetmi partner real i SPAK, duke treguar se nga njëra anë administrata publike ka bërë ZERO kallëzime në SPAK, ndërsa opozita nuk guxon të kallëzojë aferat ku përfshihen oligarkët.
