Marrëdhënia mes sportit dhe muajit të Ramazanit ka qenë shpesh e ndërlikuar. Abstenimi ndaj ujit dhe ushqimit gjatë ditës i pengon sportistët të ushqehen për gara, duke pasur mundësi të prishin agjërimin vetëm pas perëndimit të diellit. Kjo i shtyn shumë sportistë të ndërpresin aktivitetin e tyre kompetitiv në orët e mbrëmjes për t'u freskuar. Por kjo nuk është e autorizuar në Francë, ku shpërthyen polemikat për vendimin e marrë nga Federata franceze e futbollit për të mos autorizuar pushimet gjatë ndeshjeve të mbrëmjes së kampionatit të futbollit.
Ndryshe nga ajo që ndodh në vendet fqinje si Gjermania, Holanda dhe Anglia, federata franceze zbaton parimin e neutralitetit fetar të parashikuar në kushtetutën franceze. E kështu, kjo ndërlikon jetën e futbollistëve që synojnë të agjërojnë, por mbi të gjitha hedh themelet për një diskriminim të mundshëm, siç akuzon Demba Ba, ish-lojtari i kombëtares senegaleze, lindur në Francë dhe mysliman: “Duan t'i ndalojnë të jenë myslimanë. Na pëlqen apo jo, është pjesë e identitetit tonë që ne po përpiqemi ta fshijmë."
Presidenti i Federatës së Futbollit Philippe Diallo iu përgjigj me shpejtësi akuzave. Ai u mbrojt duke pretenduar se nuk ka asnjë qëllim diskriminues pas këtyre zgjedhjeve. "Askush në Federatë, duke filluar nga unë, nuk ka ndaluar askënd që të agjërojë. Nuk mund të pranoj të thuhet se FFF diskriminon për arsye fetare - shpjegoi numri një i organizmit francez, duke shpjeguar se si nuk mund të ketë ndryshime në oraret dhe praktikat e zakonshme në kampet stërvitore ekskluzivisht për arsye fetare -. Unë respektoj besimet e të gjithëve. Kur lojtarët zgjidhen për kombëtaren franceze, nuk pyes se cila është feja e tyre."
