"E kishim përgatitur ndeshjen ndryshe, nuk e interpretuam si duhej, u goditëm me dy gola. Kur goditesh, ana psikologjike bie pak, dhe çdo gjë shkoi për keq mbrapa". Erbim Fagu është i pangushëllueshëm, pas humbjes 1-2 me Teutën. Tirana e tij zhgënjeu në të gjithë aspektet dhe bëri hapa prapa në krahasim me derbin: "E vuajtëm sot finalizimin, nuk ishim të qartë kur dilnim përpara, kishte konfuzion. Nuk e di pse, se gjatë javës kemi qenë në harmoni. Fitorja me Dinamon na rregulloi pak anën psikologjike, por sot nuk di edhe unë çfarë përgjigje të jap".
Fagu pastaj tregoi detaje të asaj që e penalizon për të bërë lëvizjet që do të donte: "Për kaq pak kohë mundohesh të bësh ndryshime të vogla, jo shumë të mëdha se mund të prishësh ekuilibrat. Unë jam përpjekur që me këtë grup të mos ndryshoj shumë nga ana e fizionomisë e filozofisë së lojës. Sot ia lë interpretimit të ndeshjes që nuk ishte aty ku duhet". Ajo që tekniku vuan është fakti se Tirana është jashtë katërshes finale, ndonëse për potencial mund të fitojë edhe titullin kampion: "Sigurisht që po, mendoj që jemi ende në luftë për të kapur “Final Four” e pastaj të dalim kampion se aty specifika është tjetër gjë dhe me një ndeshje mund të dalësh kampion", tha Fagu.
MARTINI: "ISHTE NDESHJA E REVANSHIT"
“Ishte ndeshja e revanshit. Nuk e harroj eliminimin nga Kupa, pavarësisht pikëve që na duheshin, ekipi ishte i karikuar, luajti mirë, presuam Tiranën. Në Elbasan për Kupë luajtëm më mirë. Nuk jam i kënaqur me mënyrën si shkoi ndeshja". Edi Martini e bën të qartë natyrën e tij hakmarrëse dhe faktin se dëshironte shumë të mundte kundërshtarin që e privoi nga Europë këtë sezon. "E çuam ndeshjen aty ku donim për sa i përket përgatitjes, e çuam te topat e gjatë, çdo veprim të tyre e kishim parashikuar".
Lexo më tej: Jazxhi e Daci shembin Tiranën: nis faza e Teutës, ku durrsakët shkojnë nga mbijetesa drejt Europës
Tekniku i Teutës kujtoi megjithatë se nuk heq dorë nga ëndërra: "Kemi një ndeshje shumë të rëndësishme të prapambetur me Dinamon, ajo do e ndajë rrugën jemi për katërshe apo për të luftuar për poshtë. Në këtë kampionat, me 1-2 fitore shkon lartë. Do ta kërkojmë katërshen, do të luajmë deri në sekondën e fundit, ishalla kemi dhe pak fat". E në fund, edhe njëherë një mendim për Kupën dhe mundësinë e madhe të humbur: "Kupa më ka dhembur shumë. Do të ishim me Kukësin në gjysmëfinale, mund të fitonim Kupën. Këtë fitore do e ndërroja me kualifikimin e Kupës 100 %. Tani si ka ardhur kampionati nuk janë më gjërat në dorën tonë, varemi nga rezultatet e kundërshtarëve".
