Në mbledhjen e zhvilluar këtë të mërkurë Këshilli i Ministrave vendosi krijimin e Këshillit Kombëtar të Ujit. Ai do të kryesohet nga kryeministri Edi Rama si dhe nga 7 anëtarë, të cilët do të jenë ministrja e Mjedisit dhe Turizmit, Mirela Kumbaro, ministrja e Bujqësisë, Anila Denaj, ministrja e Infrastrukturës, Belinda Balluku, ministri i Financave, Ervin Mete, ministri Blendi Gonxhe si dhe ministrja Albana Koçiu.
Sipas vendimit të këshillit të ministrave, në rast se kryeministri Rama nuk do të jetë prezent në mbjedhje, ajo do të drejtohet nga zv.kryeministrja Belinda Balluku.
Ngritja e Këshillit Kombëtar të Ujit u bë me vendim qeverie në muajin dhjetor të vitit të kaluar dhe ka si synim planifikimin dhe zhvillimin e territorit dhe kontrollin dhe disiplinimin e punimeve të ndërtimit
V E N D I M PËR PËRBËRJEN E KËSHILLIT KOMBËTAR TË UJIT
Në mbështetje të nenit 100 të Kushtetutës dhe të shkronjës “a”, të pikës 1, të nenit 8, të ligjit nr.111/2012, “Për menaxhimin e integruar të burimeve ujore”, të ndryshuar, me propozimin e Kryeministrit, Këshilli i Ministrave
V E N D O S I:
1. Këshilli Kombëtar i Ujit është organi qendror vendimmarrës, përgjegjës për administrimin e burimeve ujore. Këshilli Kombëtar i Ujit kryesohet nga Kryeministri dhe ka në përbërje këta anëtarë:
– Ministrin përgjegjës për mjedisin dhe turizmin;
– Ministrin përgjegjës për bujqësinë;
– Ministrin përgjegjës për infrastrukturën;
– Ministrin përgjegjës për financat;
– Ministrin përgjegjës për ekonominë;
– Ministrin përgjegjës për mbrojtjen;
– Ministrin përgjegjës për shëndetësinë.
2. Kur, për shkaqe të arsyeshme, Kryeministri nuk mund të marrë pjesë në mbledhje, atëherë mbledhja kryesohet nga Zëvendëskryeministri.
3. Vendimi nr.590, datë 18.10.2017, i Këshillit të Ministrave, “Për përbërjen e Këshillit Kombëtar të Ujit”, i ndryshuar, shfuqizohet.
4. Ngarkohet Këshilli Kombëtar i Ujit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
