Fitoi Tirana, por nuk fitoi skuadra më e mirë në fushë. Bardheblutë kalojnë me shumë fat 1-0 Kukësin, në një ndeshje që verilindorët e luajtën krejtësisht në kërkim të fitores. Ka natyrisht episode që Devolli ndjen keqardhje: penalltia e mohuar nga Ferataj, pas thirrjes në VAR për të riparë aksionin e dy traversat e goditura nga Adetola dhe Solodovnikov. E pastaj, dy minuta nga fundi, Abazaj shënoi golin që vendosi ndeshjen në kundërsulm.
Kukësi provoi i pari në minutën e 10' me Bershiraj. Ish-sulmuesi bardheblu vuri në provë të vështirë një Abdullahu vendimtar në këtë rast, por të pasigurtë në disa momente gjatë ndeshjes. Përgjigja e Tiranës erdhi me goditjen me kokë të Patrick që gjeti reagimin brilant të Tafas. Zhongo provoi të bënte keq por nuk kishte shënjestrën e duhur, duke dhënë shenjat e ndeshjes që Kukësi do bënte në pjesën e dytë.
Video/ penalltia e pretenduar nga Salami
ARBITRI E FATI I KEQ
Beshiraj dhe Salami ishin të frymëzuar, por ish-lojtari bardheblu ushtroi shumë forcë mbi topin duke e kaluar mbi traversë, ndërsa Salami corientoi Micin në më shumë se një rast. Episodi i parë i rëndësishëm ishte ai i minutës së 68’ kur Deliu ndërhyri ndaj Salami në zonë. Ferataj u thirr në VAR për ta rishikuar ndërhyrjen, por arbitri mbajti qendrimin e tij, duke i mohuar një penallti Kukësit. Kësaj i shtohet edhe fati i keq, ai i dy traversave të goditura në dy minuta. Në fillim Adetola dhe më pas Solodovnikov e stampuan topin në traversë, para se Kukësi të shembej në kundërsulm, atë të finalizohej nga Abazaj.
Kukësi humbet një ndeshje që nuk meritonte ta humbiste, me Devollin që mbetet në situatë kritike, edhe pse ajo e tij po shfaqet në fushë një skuadër e të gjithë respektit. Tirana mori 3 pikë që i duken si një dhuratë e ardhur nga lart e për këtë tashmë bën presion mbi zonën Final Four. Vetëm se Fagu duhet ta ketë të qartë, me këtë mënyrë loje nuk duhet se mund të shkojë larg.
