“Ishte ndeshje e tensionuar, të dyja skuadrave iu duheshin pikë. Vllaznia ishte e kënaqur me barazim, ne na duhej patjetër të fitonim. Shihej tensionin në fushë. Të dyja ekipet luanin me topa të gjatë, më i drejtë ishte barazimi në këtë sfidë”. Edi Martini nuk është i kënaqur me barazimin pa gola me Vllazninë. Skuadra e tij ka mbetur në zonën playout kur kanë mbetur edhe 4 ndeshje deri në fund.
Një arsye më shumë për të kërkuar dëshpërimisht fitoren: “Kërkoja me ngulm të fitoja ndeshjen, mendoja se do të fitonim, duke parë edhe ecurinë e Vllaznisë, gjithsesi ata kanë kualitete, prap nuk jam i kënaqur me rezultatin, duhet të kishim marrë 3 pikë”, tha Martini që pastaj shtoi. “Kjo skuadër meritonte më shumë, po të shikosh golat e pësuara në sekondat e fundit dhe penalltitë e humbura, patjetër që do të ishim në katërshe. Fati na ka dënuar në shumicën e ndeshjeve”, e mbylli Martini.
OSMANI: “TEST PËR KUPËN”
“Pas rezultateve të fundit që patëm ishim të detyruam të ndryshonim diçka dhe të freskonim ekipin. Jam i kënaqur me paraqitjen e lojtarëve. Kundër Egnatias të mërkurën kemi Stojanovic dhe Hakaj me karton të kuq, kurse sot ishte test për lojtarët që mendoj t’i aktivizoj në kupë”. Qatip Osmani mendon për ndeshjen e kthimit me Egnatian, në gjysmëfinale, ku duhet të rikuperojë rezultatin 1-0, në kohën kur rrezikon të humbasë vendin e dytë në renditjen e kampionatit.
Lexo më tej: Video/ Vllaznia nuk di më të fitojë, Teuta mbetet pas Laçit: stuhi polemikash për golin e anuluar durrsakëve
Tekniku që arrin në ndeshjen e pestë pa fitore, shpjegon ndeshjen me Teutën: “Pjesën e parë u orientuam më shumë në lojën mbrojtëse. Nuk depërtonim në sulm. Në momentet e duhura kur duhej të sulmonim, nuk kishim pasimin e fundit. Kjo pikë sigurisht që vlen. Në fund të kampionatit do të vlejë se ndoshta momentalisht jo dhe aq shumë”.
