Nga e shtuna e 4 majit nis sprinti i fundit i skuadrave të Superiores për arritjet e objektivëve. Të gjitha ndeshjet e tre javëve të fundit të kampionatit do të luhen në të njëjtën ditë e orar e në harkun e vetëm 7 ditëve. Java e 34-të e kampionatit “Abissnet Superiore” do të luhet të shtunën në orën 16:00. Pesë takime interesante që do të vendosin shumë për objektivat e skuadrave.
PESË NDESHJET TË SHTUNËN
Në “Niko Dovana” Teuta do të presë Egnatian e vendit të parë me synimin për të marrë një tjetër fitore që do ta largonte akoma më shumë nga vendi i 8-të. Martini ka evituar rënien e menjëhershme, por duhet të ruhet nga zona playout. Duke qenë se matematikisht është e mundur edhe përfshirja në Final Four, Teuta ka ndërmend ta provojë deri në fund. Rrogozhinasit, nga ana tjetër, do të kërkojnë të rikthehen te triumfi për të blinduar vendin e parë.
Vllaznia dhe Partizani janë vetëm një hap larg për të siguruar matematikisht një vend në “Final 4” në Superiore. Lufta mes tyre megjithatë është e gjitha për vendin e dytë. Kuqeblutë do të presin Dinamo City në “Loro Boriçi”, ndërsa të kuqtë do të përballen në “Arenën e Demave” me Skënderbeun. Dy ndeshje shumë të rëndësishme për të 4 skuadrat. Dinamo e Skënderbeu ndajnë pikët dhe kanë një më shumë se Tirana. Kështu, fitorja ose humbja në javën e 34 mund të përcaktojë edhe të ardhmen e tyre në Final 4 apo jo.
Lexo më tej: Tre makina VAR për 5 ndeshje, zgjidhja vjen nga Kosova: FSHF dhe FFK kanë të njëjtin problem
Laçi – Tirana është një tjetër sfidë interesante që pritet të dhurojë spektakël këtë javë, pasi të dyja ekipet kanë si objektiv vetëm fitoren. Bardheblutë rrezikojnë në këtë ndeshje të mbeten jashtë Europës, në kohën kur Cungu e bardhezinjtë e tij duan të evitojnë zonën playout. Ndeshja tjetër e javës së 34-të është Erzeni – Kukësi. Shijakasit do të synojnë fitoren ndaj verilindorëve për të mbajtur gjallë shpresat për vendin e 8-të në kampionat, edhe pse rënia bashkë me Kukësin në Kategorinë e Parë duket e pashmangshme.
